На прафесара Яна Маліцкага напалі ў цэнтры Варшавы. Цяпер ён у шпіталі. Асобы нападнікаў невядомыя.
Дырэктарка Школы ўсходніх моваў пры Цэнтры Усходняй Еўропы Інга Катаньска паведаміла журналістам праз электронную пошту, што ў ноч на 20 снежня ў Казіміраўскім парку, размешчаным у цэнтры Варшавы, адбыўся замах на жыццё кіраўніка Цэнтру і дырэктара стыпендыяльнай праграмы імя Кастуся Каліноўскага Яна Маліцкага.
Паводле ліста Катаньскай, два мужчыны спыталі ў Маліцкага, як яго зваць. Калі Маліцкі назваў сваё імя, то атрымаў удар у галаву і страціў прытомнасць. Ён прыйшоў у прытомнасць у машыне хуткай дапамогі. Прафесара даставілі ў Праскі шпіталь у Варшаве.
Абноўлена. Інга Катаньска расказала «Белсату», што Ян Маліцкі быў на сустрэчы ў варшаўскім раёне Павісьле (Powiśle), пасля чаго вяртаўся ва ўніверсітэцкую сядзібу праз Казіміраўскі парк. Там да яго падышлі нападнікі, апранутыя ў форму, падобную да гарадской варты, таму ён і назваў ім сваё імя. Хуткую выклікаў выпадковы сведка. Цяпер Маліцкі шпіталізаваны з сімптомамі страсення мазгоў і падазрэннем на пералом косткі.
Усіх, хто мае звесткі пра напад, просяць звязацца з паліцыяй або Агенцтвам унутранай бяспекі Польшчы.
