Штодня да 25 снежня «Белсат» адкрывае новыя цікавінкі пра вядомых беларусаў і беларусак у сваім адвэнт-календары. Глядзіце анкеты з адказамі і трымайце добры настрой ужо зараз!
Сёння ў акенцы № 23 святочнага календара наш перадапошні герой – беларускі музыка, паэт і адзін з заснавальнікаў гурта «Бі-2» Лёва. За 35 гадоў існавання гурт выпусціў 11 студыйных альбомаў, апошні з іх выйшаў у 2022 годзе.
У 2020-м музыкі падтрымалі пратэсты супраць сфальсіфікаваных вынікаў выбараў у Беларусі. Пасля пачатку поўнамаштабнай вайны Расеі ва Украіне гурт «Бі-2» выступіў супраць вайны і адмовіўся праводзіць канцэрты пад мілітарысцкай сімволікай, у выніку чаго Лёва атрымаў у Расеі статус замежнага агента, а гурт – забарону на канцэрты. У студзені 2024 года шэсць удзельнікаў гурта «Бі-2» некалькі дзён правялі ў міграцыйнай турме Тайланду, дзе ім пагражалі дэпартацыяй у Расею.
Цяпер Лёва жыве ў Іспаніі, Шура – у ЗША, а гурт ладзіць еўрапейскае турнэ. Месяц таму музыкі былі героямі беларускай праграмы «Без рэтушы».
13 шчырых адказаў Лёвы чытайце ніжэй:
1. Галоўная падзея гэтага года для вас: Нарэшце з'ездзіў у Ісландыю
2. Апішыце гэты год адным словам: Цікавы :)
3. Якім персанажам вы б апрануліся на Каляды? Кракадзілам (у мяне ёсць такі касцюм)
4. Самы шчаслівы момант 2024 года: Выхад відэа на песню «Не злуй маіх анёлаў»
5. А галоўны фэйл: Пра гэта і так усе ведаюць :)
6. Якая беларуская навіна ўразіла вас больш за ўсё ў гэтым годзе? А што, былі навіны?
7. З кім з беларусаў вы хацелі б пазнаёміцца? Раблю гэта рэгулярна і з задавальненнем
8. Якая песня ў вас гучала часцей за ўсё ў гэтым годзе? Я люблю цішыню (гэта не назва песні, проста люблю цішыню)
9. Хто з беларусаў стаўся для вас асабістым адкрыццём года? Святлана Алексіевіч (дабраўся да ейнай кнігі «Час сэканд-хэнд»)
10. Ваш любімы калядны фільм: «Грынч – выкрадальнік Раства» з Джымам Кэры
11. Топ-3 вашых улюбёных месцаў на Зямлі: Іспанія, Латвія, Малдова
12. Вашая мара на наступны год: Ёсць яшчэ тыдзень разабрацца з марамі на гэты год
13. Што б вы пажадалі беларусам у новым годзе? Вы і так гэта ведаеце, пажаданне ў нас ва ўсіх агульнае
Паглядзець папярэднія адказы герояў можна тут, а ўжо заўтра вас чакаюць апошняе акенца адвэнт-календара і апошні ў гэтым годзе герой.
Тэса Анэйда belsat.eu
