17 снежня на сустрэчы з намеснікам кіраўніка Аб’яднанага пераходнага кабінету (АПК), кіраўніком Народнага антыкрызіснага ўпраўлення (НАУ) Паўлам Латушкам намесніца міністра замежных справаў Польшчы Гэнрыка Масьціцка-Дэндыс заявіла, што Беларусь стане адным з прыярытэтаў падчас старшынёўства Польшчы ў Еўразвязе.
Як адзначае прэс-служба АПК, адным з «галоўных прыярытэтаў ЕЗ будзе “падтрыманне дэмакратычных памкненняў беларусаў”».
У ліку «найважнейшых падзеяў» гэтага перыяду Кабінет называе правядзенне ў пачатку лютага 2025 года з ініцыятывы міністра замежных справаў Польшчы Радослава Сікорскага Форуму Касцюшкі – канферэнцыі высокага ўзроўню, на якую плануюць запрасіць «як кіраўнікоў шэрагу міністэрстваў замежных справаў еўрапейскіх краіназ, гэтак і кіраўніка ды прадстаўнікоў Аб’яднанага пераходнага кабінету, Каардынацыйнай рады, а таксама іншых прадстаўнікоў беларускага дэмакратычнага грамадства».
На сустрэчы Латушка падзякаваў Польшчы за арганізацыю Дзён Беларусі ў Бруселі з 9 да 13 снежня, якія сталіся «важным сігналам падтрымання для беларускай дэмакратычнай супольнасці».
Таксама палітык адзначыў важнасць чацвёртага паседжання кансультацыйнай групы Беларусь – ЕЗ, што прайшло ў тыя ж дні.
«Асобна Павел Латушка праінфармаваў намміністра замежных справаў пра ўзмацненне рэпрэсіяў у Беларусі напярэдадні выбараў, – адзначаецца ў паведамленні АПК. – Латушка і Гэнрыка Масьціцка-Дэндыс пагадзіліся, што сёння няма ніякіх падставаў і ўмоваў для таго, каб назваць фарс, зарганізаваны рэжымам, дэмакратычнымі і празрыстымі выбарамі. Польшча будзе браць удзел у рыхтаванні агульнай пазіцыі ЕЗ, якая, як плануецца, будзе агучаная адразу пасля 26 студзеня 2025 года».
Сярод іншага на сустрэчы абмяркоўваліся пытанні прыцягнення да адказнасці Аляксандра Лукашэнкі і «ягоных памагатых за злачынствы супраць чалавечнасці» і «ваенныя злачынствы супраць украінскага народу».
Латушка папрасіў Масьціцку-Дэндыс падтрымаць зварот ураду Літвы ў Міжнародны крымінальны суд наконт выдачы ордару на арышт Лукашэнкі. Намесніца міністра падкрэсліла, што Польшча «палітычна падтрымлівае гэты крок».
«Асобна былі пададзеныя магчымасці выкарыстання механізмаў АБСЕ на шляху дасягнення адказнасці прадстаўнікоў рэжыму Лукашэнкі», – адзначаецца ў рэлізе АПК.
Таксама паведамляецца, што з удзелам дырэктаркі консульскага дэпартаменту МЗС Польшчы Юстыны Хшаноўскай бакі «абмеркавалі візавыя пытанні і пытанні легалізацыі беларусаў у Польшчы», у тым ліку праблемы «выдачы візаў на падставе запрашэнняў беларусаў, якія маюць міжнародную абарону ў Польшчы».
Нагадаем, што Польшча будзе старшыняваць у ЕЗ у першай палове 2025 года.
Надзея Вольная belsat.eu
