Беларус Антон (імя змененае з меркаванняў бяспекі) сёлета папрасіў прытулак у Балгарыі, аднак мясцовае агенцыя па справах уцекачоў вырашыла, што яму і ў Беларусі бяспечна, таму няма дастатковых падставаў для надання статусу ўцекача. Мужчына пайшоў у суд, піша «Радыё Свабода».
Па словах Антона, у 2020 годзе ён жыў у Менску разам з сям’ёй і збіраў подпісы за Віктара Бабарыку, хадзіў на пратэсты, даваў інтэрв’ю СМІ. Жонку Антона затрымлівалі на адным з маршаў, штрафавалі.
У 2022 годзе сям’я пераехала ў Грузію, а адтуль – у Балгарыю, дзе беларус спадзяваўся атрымаць прытулак, аднак атрымаў адмову.
,,«Прычыны, на падставе якіх замежны грамадзянін звяртаецца з прашэннем, не пацвярджаюць абгрунтаваных страхаў пераследу ці рэальнай небяспекі прычынення сур’ёзнай шкоды», – гаварылася ў адмове.
Паводле версіі Агенцыі, аналіз гісторыі ўцекача паказваў, што «адзінай прычынай, з якой заяўнік звярнуўся па абарону ў Балгарыі, была зробленая ягонай жонцы прапанова аб працы ў Балгарыі».
У адмове звярталася ўвага на тое, што Антон без перашкодаў і легальна пакінуў Беларусь 17 лютага 2022 года. Агенцыі засталося незразумелым, чаму мужчына не папрасіў прытулак у Грузіі. У дакуменце, які атрымаў беларус, выказваліся сумневы, што ён насамрэч пакінуў Беларусь, бо баяўся пераследу.
Сітуацыю Антона міграцыйныя ўлады Балгарыі расцанілі як «няўмелую спробу надаць палітычнае адценне сваёй гісторыі ўцекача, рэальнай і адзінай мэтай якой з'яўляецца легалізацыя знаходжання ў Балгарыі». Агенцыя пры разглядзе справы спасылалася на заключэнне міжнародных структураў аб сітуацыі ў Беларусі за 2014 год.
У кастрычніку 2024 года Антон звярнуўся ў Адміністрацыйны суд у Сафіі з просьбай перагляду ягонай заяўкі на атрыманне прытулку. 16 снежня Антон атрымаў рашэнне Адміністрацыйнага суду, у якім называюцца неабгрунтаванымі довады міграцыйных уладаў аб тым, што Грузія з'яўляецца бяспечнай краінай, бо «сітуацыя там напружаная, яна ахопленая пратэстамі, краіна масава адмаўляе беларусам у прытулку».
Адміністрацыйны суд Сафіі вырашыў адмяніць рашэнне Агенцыі ў справах уцекачоў і абавязаць яе прыняць новае рашэнне ў справе беларуса. Антон спадзяецца, што ягоная справа вырашыцца пазітыўна.
Марыя Міхалевіч belsat.eu
