Міністэрства надзвычайных сітуацыяў Беларусі агучыла наступствы моцнага ветру з парывамі да 26 метраў за секунду, што абрынуўся на краіну 16 снежня.
Паводле МНС, пацярпелі 54 паселішчы, з іх 34 - на Берасцейшчыне. Пашкоджаныя дахі 21 жылога дому, адной гаспадарчай пабудовы, аднаго аб’екту сацкультбыту і 79 сельскагаспадарчых будынкаў. Мяркуючы з фота, быў пашкоджаны гістарычны драўляны будынак царквы на Берасцейшчыне.
У выніку разбурэння кароўніку ў вёсцы Ваўчкі Слонімскага раёну загінулі пяць кароваў.
Зафіксаваныя таксама 50 выпадкаў падзення дрэваў. Апроч таго, адбылося падзенне пяці навагодніх елак: трох у Горадні і па адной – у Калінкавічах і Заслаўі. Пацярпелых няма.
17 снежня на большай частцы тэрыторыі Беларусі захаваецца ўзмацненне заходняга, паўночна-заходняга ветру парывамі 15–20 м/с. Магчымыя абрыў лініяў сувязі і электраперадачы, парушэнне электразабеспячэння, пашкоджанне слаба ўмацаваных канструкцыяў, дахаў будынкаў, збудаванняў, падзенне дрэваў.
Таксама глядзіце ў сюжэце:
Якуб Хруст belsat.eu
