Санкцыйны спіс Еўразвязу папоўніўся шэрагам прозвішчаў беларускіх суддзяў, якія выносілі палітычна матываваныя выракі, паведамляе Народнае антыкрызіснае ўпраўленне.
Народнае антыкрызіснае ўпраўленне 11 кастрычніка 2024 года перадало ў Еўрапейскую службу замежнапалітычнай дзейнасці прапановы з доказамі і падрабязным абгрунтаваннем для пашырэння санкцыйнага спісу ЕЗ. Адбыўся таксама шэраг сустрэчаў у структурах ЕЗ у Бруселі, каб прасоўваць гэтыя прапановы. Рада Еўразвязу пасля юрыдычнай экспертызы ўхваліла санкцыі.
«Сёння мы бачым канкрэтны вынік: "суддзі", адказныя за фабрыкаванне палітычна матываваных прысудаў у дачыненні беларусаў, унесеныя ў санкцыйныя спісы. Нашыя прапановы прынятыя», – гаворыцца ў тэлеграм-канале НАУ.
У санкцыйны спіс ЕЗ дададзеныя наступныя суддзі:
• Вера Філонік – суддзя Берасцейскага абласнога суда;
• Ірына Прадун – суддзя і старшыня суда Рагачоўскага раёну Гомельскай вобласці;
• Віталь Сініла – суддзя і старшыня суда Мастоўскага раёну Гарадзенскай вобласці;
• Вадзім Мазоль – суддзя Берасцейскага абласнога суда;
• Ніна Шастак – суддзя Менскага абласнога суда;
• Ірына Майко – суддзя Менскага абласнога суда;
• Васіль Бягун – суддзя Гомельскага абласнога суда;
• Яўген Брэган – суддзя Берасцейскага абласнога суда;
• Аляксандр Мохараў – суддзя суда Савецкага раёну Гомля;
• Алеся Восіпава – суддзя суда Цэнтральнага раёну Гомля;
• Віктар Новік – старшыня суда Жабінкаўскага раёну.
Доказы, сабраныя камандай НАУ, не толькі былі падставаю для забароны названым суддзям уязджаць у ЕЗ, але і ўвойдуць у будучыні ў іхныя крымінальныя справы.
Акрамя таго, у санкцыйны спіс ЕЗ на прапанову НАУ ўнесеныя працаўнікі пенітэнцыярных установаў Беларусі:
• Вадзім Мурашка – начальнік папраўчай калоніі № 13 у Глыбокім;
• Сяргей Бярэйшык – працаўнік СІЗА № 1 у Менску;
• Мікалай Мушкароў – працаўнік СІЗА № 1 у Менску;
• Сяргей Петраковіч – начальнік папраўчай калоніі № 9 у Горках;
• Віктар Лутцаў – начальнік медычнай часткі турмы № 1 у Горадні.
«Пашырэнне санкцыйных спісаў – важнае сведчанне таго, што голас беларусаў чуюць у ЕЗ. […] Усім злачынцам у мантыях і форме варта памятаць: адказнасць – непазбежная», – зазначае намеснік Святланы Ціханоўскай у Аб'яднаным пераходным кабінеце, кіраўнік НАУ Павел Латушка.
Марыя Міхалевіч belsat.eu
