Бізнесоўца Аляксандра Апольку затрымалі ў жніўні сёлета. 26 снежня яго пачнуць судзіць. Справу разгледзяць у судзе Кастрычніцкага раёну Менску.
У раскладзе пасяджэнняў на сайце Вярхоўнага суда з'явілася справа кіраўніка сеткі будаўнічых гіпермаркетаў «Мацярык» Аляксандра Аполькі, звярнула ўвагу «Наша Ніва». Працэс распачнецца 26 снежня. Бізнесоўца абвінавачваюць паводле «народнага» артыкулу аб групавых дзеяннях, што груба парушаюць грамадскі парадак. Максімальная санкцыя – 4 года зняволення.
Справу разгледзяць у судзе Кастрычніцкага раёну Менску, працэс будзе весці суддзя Іна Сівец.
Апольку затрымалі ў жніўні, тады ў праўладных рэсурсах апублікавалі зневажальнае відэа, на якім бізнесовец сказаў, што браў удзел у пратэстах у 2020 годзе.
«Мацярык» – найбуйнейшая ў Беларусі сетка будаўнічых гіпермаркетаў. Агулам у краіне пяць крамаў гэтага брэнду: дзве ў Менску, па адной у Віцебску, Берасці і Горадні.
Аполька – дырэктар і сузаснавальнік кампаніі «ЭРНIС», якой акрамя «Мацерыка», належаць крамы «Палас», іх у Беларусі восем.
Сцяпан Кубік belsat.eu
