У Гомельскім абласным судзе 13 снежня 2024 года была разгледжаная апеляцыйная скарга палітзняволенай Паліны Шарэнды-Панасюк, паведамляе берасцейская «Вясна».
Паводле дадзеных праваабаронцаў, прысуд Рэчыцкага раённага суду ад 15 кастрычніка застаўся без зменаў, то бок жанчыне дадалі яшчэ год зняволення.
Цягам наступных дзён Паліна будзе пераведзеная ў калонію №24 у Зарэччы для жанчын-рэцэдывістак для далейшага адбыцця пакарання. У гэтай калоніі Паліна Шарэнда-Панасюк знаходзілася 2,5 гады.
Гэта ўжо трэці прысуд Паліне паводле арт. 411 КК РБ за нібыта «злоснае непадпарадкаванне адміністрацыі калоніі».
У Паліны Шарэнды-Панасюк – слабое здароўе, у калоніі ў яе развіўся хранічны панкрэатыт. На волі палітзняволеную чакаюць двое непаўнагадовых дзяцей, Славамір і Стах.
Паліну затрымалі 3 студзеня 2021 года. У чэрвені 2021 года суд Маскоўскага раёну Берасця прысудзіў Паліне Шарэндзе-Панасюк 2 гады пазбаўлення волі ва ўмовах агульнага рэжыму адразу паводле некалькіх крымінальных артыкулаў: арт. 364 КК («Гвалт у дачыненні працаўніка органаў унутраных справаў»), арт. 369 КК («Знявага прадстаўніка ўлады») і арт. 368 КК («Публічная абраза прэзідэнта»).
Пасля адбыцця двух гадоў жанчына з-за кратаў не выйшла, цяпер ёй штогод працягваюць тэрмін зняволення праз пакаранне паводле арт. 411 КК.
Марыя Міхалевіч belsat.eu
