Два былых сілавіка падтрымалі пратэсты ў Беларусі ў 2020 годзе і былі вымушаныя з’ехаць за мяжу ад рэпрэсій. У Літве яны падалі дакументы на атрыманне статусу ўцекачоў, але ім адмовілі, бо яны нібыта могуць быць завербаваныя беларускімі спецслужбамі. Пра гэта «Белсату» паведаміў кіраўнік «BYPOL» Аляксандр Азараў.
«Адзін з іх сядзеў у СІЗА КДБ, уцёк, падаўся на бежанства ў Літве і яму адмовілі, – кажа Аляксандр Азараў. – Летам ён падаўся на бежанства ў Польшчы.
А другі, малады хлопец, выехаў некалькі год таму. Калі былі пратэсты, ён яшчэ вучыўся ў Акадэміі МУС. Потым пайшоў працаваць, але ўцёк – ён дапамагаў [BYPOL. – Заўв. рэд.] і гэтак далей. Яму таксама адмовілі ў бежанстве ў Літве. Тыдзень таму ён падаўся на бежанства ў Польшчы. Абодва пераходзілі мяжу з Літвой нелегальна».
Паводле прадстаўніка «BYPOL», мужчынам адмовілі ва ўцякацтве ў Літве праз тое, што яны працавалі ў праваахоўных ворганах у Беларусі і могуць быць завербаваныя спецслужбамі.
Пакуль абодва чакаюць вынікаў разгляду дакументаў у Польшчы.
Адразу пасля пратэстаў 2020 года Літва была краінай, якая актыўна прымала беларусаў, якія ўцякалі ад рэпрэсіяў на радзіме. Аднак, пасля пачатку поўнамаштабнай вайны ва Украіне, умовы для беларусаў пагоршыліся. Прызнаць пагрозай нацыянальнай бяспекі Літвы могуць нават за тое, што чалавек працаваў у беларускім банку. Верагодна, такая палітыка з’яўляецца прычынай таго, што скарачаецца колькасць Беларусаў з літоўскім ВНЖ.
Арсен Рудэнка belsat.eu
