Марк Рутэ прапанаваў павялічыць вайсковыя выдаткі краінаў – чальцоў NATO. Ён мяркуе, што гэта адзіны спосаб пазбегчы буйной вайны на тэрыторыі краінаў Альянсу.
Падчас свайго выступу ў Бруселі генсакратар NATO Марк Рутэ заявіў, што праз чатыры-пяць гадоў Еўропа можа непасрэдна сутыкнуцца з расейскай агрэсіяй. Цяперашнія намаганні для ўмацавання абароны ён назваў недастатковымі.
«Мы не гатовыя да таго, што можа чакаць нас праз чатыры-пяць гадоў. Тое, што цяпер адбываецца ва Украіне, можа адбыцца і з намі», – перадае «Deutsche Welle» ягоныя словы.
Кіраўнік NATO адзначыў, што на гэты момант непасрэднай ваеннай пагрозы з боку Расеі няма. Але, на ягоную думку, Крэмль рыхтуецца да доўгатэрміновай канфрантацыі з Украінай і заходнімі краінамі.
Марк Рутэ прапанаваў павялічыць вайсковыя выдаткі краінаў – чальцоў NATO. На ягоную думку, гэта адзіны спосаб пазбегчы буйной вайны на тэрыторыі краінаў Альянсу:
«Калі мы не будзем выдаткоўваць больш цяпер, каб перадухіліць вайну, дык пазней заплацім значна больш – не мільярды, а трыльёны еўраў. І гэта ў выпадку, калі мы наогул пераможам».
Надзея Вольная belsat.eu
