У Беларусі абмяркоўваюць праект Кодэксу аб ахове здароўя. Пакінуць свае думкі адносна прапісаных у дакуменце нормаў можна на Прававым форуме Беларусі. Цяпер там каля 250 прапановаў. Якія змены могуць чакаць праект Кодэксу?
«Сама ідэя зрабіць кодэкс – выдатная, нам яго сапраўды не хапала. Гэта сукупнасць законаў, якія рэгулююць нейкую сферу ў пэўную сістэму. У прыватнасці, задачай кодэксу ёсць ліквідацыя супярэчнасцяў паміж нарматыўнымі актамі. Бо яны сустракаюцца», – кажа каардынатарка Фонду медычнай салідарнасці Лідзія Тарасенка.
Значная частка каментароў пад праектам Кодэксу тычыцца ўжывання дапаможных рэпрадуктыўных тэхналогіяў. Карыстальнікі, сярод іншага, прапаноўваюць забараніць у Беларусі сурагатнае мацярынства як недапушчальны від заробку. Такую захаду раней прыняў шэраг краінаў Еўразвязу, у тым ліку Нямеччына, Італія і Францыя. А вось, напрыклад, у Грузіі сурагатнае мацярынства не проста дазволенае, а актыўна развіваецца як від медычнага турызму.
,,«Калі гаворка будзе ісці пра турызм такі дэмаграфічны, то ні пра якое дэмаграфічнае паляпшэнне ў Беларусі гаворкі быць не можа. Але можа – пра паляпшэнне фінансавага стану некаторых жанчын за кошт... Ну, цяжарнасць – гэта даволі сур'ёзная нагрузка на арганізм. Таму за кошт здароўя жанчын», – разважае педыятарка Мая Церакулава.
Выступаюць каментатары і за тое, каб зрабіць выкананне рэкамедацыяў медыкаў правам пацыента. У праекце Кодэксу, як і ў дзейным заканадаўстве, такія рэкамендацыі абавязковыя да выканання. Але ці варта гэта змяніць?
«Я лічу, што пацыент абавязаны выконваць прызначэнні лекара, каб не нашкодзіць сабе і каб лекар у будучыні не прымаў няправільных нейкіх рашэнняў. Іншая рэч, што пацыент заўсёды можа спрачацца з лекарам, дамаўляцца, быць не згодным з лекарам», – тлумачыць педыятарка.
Агулам правы пацыентаў у праекце Кодэксу значна пашырылі, у адрозненне ад дзейнага закону «Аб ахове здароўя».
Цяпер да правоў аднеслі, прынамсі, магчымасць фатаграфаваць свае медычныя дакументы ды абскарджваць пастаўлены дыягназ. За медыкамі ж захавалі права на абгрунтаваную прафесійную рызыку. А вось паняткаў «доктарская памылка», «нядбайнасць» ды «ўскладненне» ў Кодэксе не прапісалі, адзначыў лекар, намеснік прадстаўніцы Аб'яднанага пераходнага кабінету ў сацыяльнай палітыцы Станіслаў Салавей:
,,«Калі мы забіраем гэтае права і забіраем абарону ад наступстваў гэтай рызыкі ў лекараў, ці будзе лекар рызыкаваць у інтарэсах пацыента? Ды ніколі. Ён жа не дурны чалавек, каб ісці і падпісвацца пад турму. Адпаведна, мы гэтым пагаршаем якасць надання медычных паслуг. У лекара павінны быць развязаныя, у добрым сэнсе слова, рукі».
Затое дзяржава паабяцала медыкам абавязковае страхаванне, у тым ліку жыцця і здароўя. Адмыслоўцы нярэдка цярпяць ад неадэкватных пацыентаў. Асабліва працаўнікі хуткай дапамогі ды прыёмных аддзяленняў у шпіталях. Таму захада, якую прапісалі ў праекце Кодэксу, вельмі важная, мяркуе Станіслаў Салавей.
Спачатку на грамадскае абмеркаванне праекту Кодэксу, які ўтрымлівае больш за 300 старонак, Міністэрства аховы здароўя адвяло 11 дзён – да 9 снежня. Аднак грамадзяне стварылі петыцыю на сайце e-petitions.by з патрабаваннем павялічыць гэты тэрмін. Відаць, чыноўнікі прыслухаліся. Пакінуць свае думкі на Прававым форуме Беларусі можна да 1 лютага наступнага года.
Таксама глядзіце ў сюжэце:
Ірына Юр'ева, «Белсат»
