Беларусь заблакавала найбуйнейшы расейскакамоўны сайт «Книга Фанфиков». У Расеі доступ да яго быў абмежаваны ў ліпені 2024 года пастановаю «Раскамнагляду».
Сайт «Книга Фанфиков» быў створаны ў 2009 годзе. Там публікуюцца творы аўтараў-аматараў. Сярод публікацый ёсць як арыгінальныя апавяданні, артыкулы, вершы, так і фанфікі – гісторыі паводле матываў кніг, кіно, серыялаў, анімэ, камп'ютарных гульняў ды іншых праектаў. Сярод фанфікаў заўважнае месца займаюць творы з сюжэтамі на тэму ЛГБТ. Сярод іх персанажаў могуць фігураваць не толькі кніжныя героі, але і рэальныя асобы – напрыклад, Аляксандр Лукашэнка і Уладзімір Пуцін.
Тое, што сайт заблакаваны, заўважылі журналісты рэсурсу «Зеркало».
У Расеі доступ да сайту «Книга Фанфиков» быў абмежаваны ў ліпені 2024 года пастановаю «Раскамнагляду». Перад тым ва ўладальнікаў сайту (юрыдычная асоба «Книга Фанфиков», зарэгістраваная ў Латвіі) патрабавалі выдаліць «інфармацыю, што прапагандуе нетрадыцыйныя сексуальныя адносіны».
«Са шкадаваннем паведамляем, што «Фикбук» [размоўная назва сайту «Книга Фанфиков» – рэд.] апынуўся ў рэестры абмежаванага доступу Рэспублікі Беларусь і недаступны для карыстальнікаў без VPN, якія там жывуць», – канстатуюць і прадстаўнікі сэрвісу.
Паводле іх, ніякіх апавяшчэнняў ці запытаў ад Беларускай дзяржінспекцыі электрасувязі (БелДІЭ) да іх не паступала. І ўвогуле за ўвесь час існавання сайту не было зваротаў ці прэтэнзіяў з Беларусі. Уладальнікі кажуць, што ні БелДІЭ, ні Мінінфармацыі Беларусі сітуацыі не каментуюць, таму дазнацца, што стала прычынай блакавання, немагчыма.
Надзея Вольная belsat.eu
