Каляндарная зіма ўжо пануе ў Беларусі, аднак кліматычнай мы яшчэ не бачым – снегу пакуль выпала няшмат. Тым не менш колькасць зімовых траўмаў ужо вырасла. Толькі цягам выходных жыхары Віцебшчыны амаль сто разоў звярнуліся да дактароў пасля падзенняў. Як зберагчыся ад траўмаванняў і што рабіць, калі гэта ўжо здарылася, запыталі адмыслоўцаў.
«Самыя частыя [траўмы], натуральна, – гэта пералом прамянёвай косткі ў тыповым месцы, бо людзі, падаючы, абапіраюцца на руку і ламаюць прамянёвую костку. Пераломы шчыкалатак вельмі часта здараюцца. І іншыя пераломы не выключаюцца: і бядровая костка, і хрыбет», – пералічвае траўматолаг Аляксей Носаў.
Паводле афіцыйнай статыстыкі, штогод беларусы атрымліваюць каля сямісот тысяч траўмаў, і кожная пятая з іх – вынік галалёду. Далёка не заўсёды гэта пераломы.
Каб знізіць траўматызм, адмыслоўцы раяць насіць узімку абутак без абцасаў, з мяккай рыфленай падэшваю. Хадзіць лепш дробнымі крокамі, нібы слізгаючы, не спяшацца. Сумкі не насіць на плячы, бо змяняецца цэнтр раўнавагі. Калі ж страцілі раўнавагу, варта групавацца і падаць набок, не выстаўляючы выпрастаных рук.
,,«Калі гэта боль у руцэ, то акуратна, прытрымліваючы руку (пажадана з дапамогай), устаць і скіравацца ў найбліжэйшы траўмапункт, каб зрабіць здымкі і адпаведныя працэдуры. Калі баліць нага, не спрабуйце рухацца самі, паклічце на дапамогу, тэлефоны ёсць ва ўсіх, званіце», – раіць Аляксей Носаў.
Рызыку траўмавацца ўзімку падвышаюць ранні надыход цемры і зменлівасць тэмператураў. Асабліва небяспечная – каля нуля, калі снег змяняецца дажджом і ўтвараецца лёд на ходніках. Не заўсёды гарадскія службы своечасова даюць рады сітуацыі.
«Працы добраўпарадкавання ажыццяўляюцца землекарыстальнікамі. За ўсё, што датычыць зямлі агульнага карыстання, адказвае выканкам. Калі з вамі штосьці здарылася, вы можаце звярнуцца ў адміністрацыю гораду ці раёну. Калі кажам пра Менск, то гэта адміністрацыя раёну», – кажа былая дэпутатка Менгарсавету Вольга Цесакова.
На мінулым тыдні стала вядома пра выпадак, калі жыхарцы Менску ўдалося прынамсі часткова атрымаць кампенсацыю шкоды ад падзення ад таварыства ўласнікаў. Паводле рэсурсу onliner.by, у пачатку года жанчына паслізнулася на абледзянелых сходах пры пад'ездзе і атрымала некалькі пераломаў, у тым ліку са зрушэннем.
Каб дамагчыся выплатаў за нанесеную шкоду здароўю, збіраць доказы трэба неадкладна, літаральна адразу пасля падзення.
,,«Вы мусіце на тэлефон зняць відэа, фота, дзе вы ўпалі, зафіксаваць гэта. Далей – выклікаць хуткую, якая таксама зафіксуе і месца здарэння, і пашкоджанні. Потым – абавязкова ўзяць з бальніцы выпіску, нават калі гэта выцін, усё адно будзе подпіс доктара», – кажа Вольга Цесакова.
Таксама трэба захаваць чэкі на ўсе платныя працэдуры і рамонт пашкоджанага адзення ці рэчаў. Калі арганізацыя, адказная за прыбіранне, адмовіцца плаціць кампенсацыю, з гэтымі доказамі можна звяртацца ў суд.
Таксама глядзіце ў сюжэце:
Ірына Дарафейчук, «Белсат»
