З 1 студзеня 2025 года консульскі збор для грамадзянаў Беларусі, якія афармляюць нацыянальную польскую візу, складзе 60 еўраў замест цяперашніх 35.
Павышэнне збору прадугледжанае ў распараджэнні міністра замежных справаў Польшчы Радослава Сікорскага ад 9 снежня 2024 года.
Ад аплаты збору пазбаўляюцца асобы, якія прэтэндуюць на гуманітарную візу, непаўналетнія асобы ў веку ад 12 да 18 гадоў і ўладальнікі карты паляка. Таксама збору не павінны плаціць асобы, якія не дасягнулі 25 гадоў і наведваюць семінары, канферэнцыі, спартовыя, культурныя ці адукацыйныя падзеі, зладжаныя некамерцыйнымі арганізацыямі.
Акрамя візавага збору, з беларусаў спаганяецца сэрвісны збор: пры падачы дакументаў у візавых цэнтрах у Менску, Гомлі, Магілёве, Берасці, Пінску і Баранавічах ён складае 18 еўраў, у Горадні і Лідзе – 12,84 еўра паводле курсу Нацыянальнага банку Беларусі.
Консульскі збор за прыём і разгляд заявы на нацыянальную візу для грамадзянаў Беларусі ў памеры 60 еўраў будзе дзеяць прынамсі да 31 снежня 2025 года. З канца снежня 2015 года да 31 снежня 2022 года беларусы былі вызваленыя ад аплаты консульскага збору за нацыянальныя візы Польшчы.
Адзначым, што спрошчаны парадак выдачы польскіх праязных дакументаў замежніка для грамадзянаў Беларусі будзе працягнуты да 30 чэрвеня 2025 года.
Якуб Хруст belsat.eu
