Улады Расеі падштурхнулі кіраўніка Сірыі Башара аль-Асада да ўцёкаў з краіны пасля таго, як зразумелі, што ён зазнаў паразу ў вайне.
Паколькі сірыйскія апазіцыйныя сілы хутка прасоўваліся да Дамаску, лёс прэзідэнта Башара аль-Асада быў у руках Расеі, бо армія самога сірыйскага кіраўніка супрацьстаяць апазіцыйным сілам не магла. Але ў выніку Крэмль прыйшоў да высновы, што не можа больш нічога зрабіць для падтрымання аль-Асада, перадае «Bloomberg» са спасылкаю на трох асобаў, знаёмых з сітуацыяй.
Каб выратаваць свайго хаўрусніка і не дапусціць паўтарэння ім лёсу лівійскага кіраўніка Муамара Кадафі, забітага паўстанцамі ў 2011 годзе, Масква пераканала аль-Асада, што ён зазнае паразу ў барацьбе з узброенымі групоўкамі, і прапанавала яму і ягонай сям’і «бяспечны пералёт, калі ён неадкладна з’едзе».
Паводле «Bloomberg», расейскія выведнікі арганізавалі ўцёкі і вывезлі аль-Асада праз сваю авіябазу ў Сірыі. Пры гэтым транспондар самалёта аль-Асада быў выключаны, каб пазбегчы адсочвання.
Цяпер жа кіраўнік Расеі Уладзімір Пуцін патрабуе растлумачыць, чаму расейская выведка не заўважыла росту пагрозаў для кіравання аль-Асада, «пакуль не сталася запозна».
Рэжым аль-Асада ў Сірыі паў 8 снежня ў выніку наступу, які апазіцыйныя сілы пачалі 27 лістапада. Некаторы час было невядома, дзе перабывае сам кіраўнік краіны. Выказваліся думкі, што ён загінуў, але пазней сталася вядома, што аль-Асад прыбыў у Маскву, дзе папрасіў палітычнага прытулку.
Якуб Хруст belsat.eu
