Кіраўнік Беларусі Аляксандр Лукашэнка 10 снежня, наведваючы Барысаў, заявіў, што ў Беларусі сапраўды ёсць ядравая зброя, хоць пра яе адсутнасць кажа арганізацыя «BELPOL». Таксама ён пракаментаваў зрынанне паўстанцамі рэжыму ў Сірыі, саюзнага Менску.
«Я сюды завёз ядравыя боегалоўкі. Не адзін дзясятак штук. Многія пішуць: "А, гэта жарт, ніхто нічога не завёз". Увезлі. Што яны кажуць, што гэта жарт, значыць, яны празявалі. Яны нават не заўважылі, як мы сюды іх завезлі», – сказаў Аляксандра Лукашэнка, перадае БелТА.
Між тым арганізацыя «BELPOL» у канцы лістапада выпусціла расследаванне адносна заяваў уладаў Беларусі ды Расеі пра дастаўку на беларускую тэрыторыю расейскай ядравай зброі. «BELPOL» звярнуў увагу на супярэчлівыя заявы Лукашэнкі і Уладзіміра Пуціна адносна пастаўкі зброі. Таксама адзначаецца, што пакуль не знойдзена ніякіх слядоў яе размяшчэння.
Паводле ж Лукашэнкі, ён «папярэдзіў усіх сваіх ворагаў, "сяброў" і супернікаў: калі толькі вы наступіце на лінію дзяржаўнай мяжы, адказ будзе імгненным».
«Я не буду глядзець – ядравую зброю ці яшчэ нейкую», – заявіў ён, хоць расейскія рэсурсы заяўляюць, што права яе выкарыстання мае толькі расейскі бок.
Лукашэнка пужае палякаў «Арэшнікам»
Таксама Лукашэнка сказаў, што думае цяпер, дзе размясціць расейскі «Арэшнік», хоць і прызнаў, што той нашмат слабейшы за ядравую зброю. З ягоных словаў, у Беларусі ёсць «з дзясяткі тры такіх пляцовак».
«Вось мы абяром, бо там мінімальная адлегласць да аб’ектаў паразы мусіць быць. Размесцім і нацэлім», – сказаў ён, заявіўшы, што разам з расейцамі будзе «націскаць на кнопку».
Лукашэнка разлічвае, што такая зброя гарантуе яму бяспеку.
,,«Калі ў нас будзе звычайная такая магутная зброя, перш чым да нас сунуцца з танкамі, якія палякі закупляюць там ад Карэі да Амерыкі, і нейкімі іншымі БМП, ракетамі, яны моцна падумаюць. Бо адказ будзе сур’ёзны. І сапраўды супраць гэтай зброі антыдоту няма. Яе немагчыма перахапіць, збіць і гэтак далей», – заявіў палітык, хоць і прызнаў, што беларусам такое можа не падабацца.
Пры гэтым ён сказаў, што ў «Арэшніку» ўся пускавая сістэма – беларуская.
Лукашэнка пра аль-Асада
Таксама Лукашэнка пракаментаваў зрынанне саюзнага яму рэжыму Башара аль-Асада ў Сірыі.
«У Сірыі ідзе барацьба асноўных гульцоў сусветных. Гэта для нас урок. Мы мусім свой лёс вызначаць самі. Трэба зберагчы сваю краіну!» – сказаў ён.
Ён спадзяецца, што новыя сілы ў Сірыі не будуць рваць стасункі з Менскам і Масквой, хоць «усё гэта ў інтарэсах Захаду і амерыканцаў».
Лукашэнка пасля паседжання Найвышэйшага дзяржаўнага савету Саюзнай дзяржавы ў Менску 6 снежня папрасіў Уладзіміра Пуціна размясціць на тэрыторыі Беларусі новыя сістэмы ўзбраення і найперш – «Арэшнік». Кіраўнік Расеі пагадзіўся.
На думку палітычнага аглядальніка радыё «Свабода» Валера Карбалевіча, гэта прапагандысцкі крок і запужванне Захаду.
«Тут і блеф, і эскалацыя. Пуцін падвышае стаўкі, умацоўвае пазіцыі перад магчымымі перамовамі ў замірэнні ва Украіне. Ён хоча іх весці з пазіцыі сілы. Размяшчэнне ў Беларусі ракеты "Арэшнік" – адзін з элементаў гэтай пазіцыі сілы. І адначасова гэта ўцягванне Беларусі ў геапалітычную барацьбу з Захадам, узмацненне залежнасці ад Расеі, асабліва ў вайсковым плане, – кажа Карбалевіч. – Цалкам зразумела, навошта гэта Пуціну. Навошта гэта Беларусі і Лукашэнку – ёсць вялікія пытанні».
Таксама глядзіце ў сюжэце:
Якуб Хруст belsat.eu
