Кіроўная рада і Агульны сход саўладальнікаў Еўрапейскага гуманітарнага ўніверсітэту паведамілі пра прызначэнне Вілюса Шадаўскаса, які раней выконваў абавязкі рэктара навучальнай установы, рэктарам на бліжэйшыя пяць гадоў.
Шадаўскаса абралі праз конкурс, у якім удзельнічалі 13 кандыдатаў з пяці краінаў.
Новаабраны рэктар прыйшоў у ЕГУ у 2018 годзе і займаў пасады кіраўніка Аддзелу стратэгічнага планавання і развіцця, канцлера, з сакавіка 2024 года – выконваючага абавязкі рэктара. На пасадзе выконваючага абавязкі рэктара Шадаўскас правёў унутраныя структурныя рэформы ва ўніверсітэце.
Новы рэктар ЕГУ мае доктарскую ступень у вобласці адукацыі – абараніў яе ва ўніверсітэце Вітаўтаса Вялікага, раней атрымаў ступень бакалаўра і магістра гісторыі ва Універсітэце адукацыі Літвы.
Афіцыйна на пасаду рэктара ЕГУ Вілюс Шадаўскас уступіць 6 студзеня 2025 года.
Марыя Міхалевіч belsat.eu
