навіны

Беларуса, якога затрымалі на пратэстах у Грузіі, удалося эвакуяваць

Яўген Муравіцкі адразу пасля выхаду з Дэпартаменту міграцыі МУС Грузіі. Фота: Раман Кісляк
Яўген Муравіцкі адразу пасля выхаду з Дэпартаменту міграцыі МУС Грузіі. Фота: Раман Кісляк
podpis źródła zdjęcia

Амбасада Літвы выдала Муравіцкаму разавую візу адным днём.

Пра гэта «Белсату» паведаміў правабаронец Раман Кісляк. З ягоных словаў, зараз Яўген Муравіцкі знаходзіцца на ўзлётнай паласе ў самалёце на шляху ў Вільню. Дзякуючы дапамозе беларусаў, праваабаронцаў, дэмсіл Беларусі і фондам салідарнасці, атрымаць візу маладому чалавеку атрымалася ў рэкондныя тэрміны.

Нагадаем, 25-гадовы Яўген Муравіцкі быў затрыманы на акцыі пратэстаў у Грузіі 30 лістапада. Хлопец апынуўся ў ліку тых, каго паліцыя спрабавала выцесніць з праспекту Руставэлі. Сілавікі раніцай разганялі пратэстоўцаў, якія засталіся, каб яны не змаглі перакрыць вуліцы ў горадзе, у тым ліку для руху грамадскага транспарту.

«Падчас затрымання некалькі разоў ударылі, у тым ліку па шыі, распылілі ў твар пярцовы газ, працягнулі прыкладна 50 метраў па зямлі, паклалі тварам у асфальт, пасля чаго затрымалі. У аўтазаку, у якім везлі яшчэ прыкладна 10 затрыманых, не білі. Агулам мне пашанцавала, бо на акцыях пратэсту бачыў сур'ёзна збітых грузінаў», – казаў «Белсату» Яўген.

У пастарунку, як ён сам распавёў, да яго ставіліся здавальняльна. Склалі пратакол, агледзелі медыкі. Амаль 48 гадзінаў беларуса пратрымалі ў «прыстойнай» двухмясцовай камеры, давалі ежу і ў цэлым ставіліся добра. Аднак медычную дапамогу, якую беларус мусіў атрымліваць з увагі на стан здароўя, ён усе гэтыя дні атрымліваць не змог.

Пасля вызвалення з СІЗА маладому чалавеку далі зразумець, што ў хуткім часе яму давядзецца пакінуць Грузію. Яго выклікалі ў Дэпартаменту міграцыі МУС Грузіі, але дэпартаваць у Беларусь не сталі: параілі добраахвотна пакінуць Грузію і адначасова дазволілі падаць заяву на статус уцекача.

Але нягледзячы на тое, што беларусу дазволілі падаць дакументы на міжнародную абарону, краіну ён вырашыў пакінуць з меркаванняў бяспекі.

Надзея Вольная, Тэса Анэйда belsat.eu

больш па гэтай тэме Глядзіце больш
Item 1 of 4
апошнія
Item 1 of 10