Злучаныя Штаты падтрымаюць беларусаў у барацьбе за будучыню іхнае краіны. Пра гэта ў відэазвароце заявіў намеснік дзяржсакратара ЗША Керт Кэмпбэл. Палітык падкрэсліў: у Амерыцы на актыўную супрацу з прадстаўнікамі беларускіх дэмакратычных сілаў настроеныя як дэмакраты, так і рэспубліканцы.
«Тое, што мы нармалізавалі адносіны паміж нашым рухам і ЗША мае беспрэцэндэнтны характар і сёння, канешне, мы будзем абмяркоўваць тое, што было зроблена за мінулы перыяд, мінулы год, і будзем ставіць планы на наступны год», – каментуе падзею абраная прэзідэнтка Святлана Ціханоўская.
Гэтак, лідарка беларускіх дэмакратычных сілаў запрапанавала замежным палітыкам прытрымлівацца чатырохкампанентнай стратэгіі ў дачыненні Беларусі: працягваць ціск на афіцыйны Менск, аказваць дапамогу грамадзянскай супольнасці і падтрымліваць беларусаў у пераходны перыяд. Ціханоўская ўпэўненая, што гэткія захады дапамогуць развязаць шэраг складаных пытанняў:
,,«Самае галоўнае - гэта як вызваліць нашых палітычных зняволенных, якія яшчэ шляхі можна прыдумаць, каб гэта зрабіць. Наша мэта – каб гэта было праз ціск на рэжым Лукашэнкі, праз дапамогу беларускам грамядзянскаму руху. Далей – гэта вызваленне краіны ад паўзучай акупацыі Расеяй і ад лукашэнкаўскага рэжыму».
На парадку дня таксама – пашырэнне супрацы з грамадзянскай супольнасцю і падтрыманне таго, што засталося ад беларускага прыватнага сектару:
«Важна памятаць, што прыватны сектар – гэта той падмурак, з якім атаясамляюцца перспектывы дэмакратызацыі, перспектывы развіцця Беларусі. І сёння вельмі шмат патрэбна зрабіць, каб, як мінімум, захаваць тыя дасягненні, якія былі. Гэта адукацыя, гэта праграмы для развіцця інавацыяў, гэта падтрымка прыватнага сектару, прыватных прадпрыемстваў, якія рэлакаваліся», – падкрэслівае старэйшы навуковы працаўнік Цэнтру BEROC Зміцер Крук.
Дэталі ж перамоваў – пад сакрэтам. Сёння асноўная частка працы праходзіць у зачыненым фармаце, без прысутнасці прэсы.
,,«Будзе выказвацца і паказвацца канфідэнцыйная інфармацыя, якая не можа стаць здабыткам грамадскасці. Ва ўсялякім разе – у наш час. Спектр пытанняў датычыцца і палітычных зняволеных, і прыцягнення рэжыму Лукашэнкі да крымінальнай адказнасці па лініі Міжнароднага крымінальнага суда», – распавядае перад пачаткам мерапрыемства прадстаўнік «BELPOL» Уладзімір Жыгар.
Першы раўнд стратэгічных перамоваў адбыўся летась у Вашынгтоне. З таго часу ўрад ЗША ўвёў пяць пакетаў санкцыяў супраць Менску. У распрацоўванні абмежаванняў бралі ўдзел прадстаўнікі Аб’яднанага пераходнага кабінету, Каардынацыйнай рады ды іншых грамадзянскіх ініцыятываў.
Цяпер, акрамя авіягаліны, санкцыі ЗША дзеюць супраць беларускіх калійных прадпрыемстваў і арганізацыяў вайскова-прамысловага комплексу.
З 2020 года на развіццё незалежнай Беларусі з амерыканскага бюджэту вылучылі каля 140 мільёнаў долараў.
Таксама глядзіце ў сюжэце:
Кацярына Гардзеева, «Белсат»
