ЮНЭСКО 4 снежня ўключыла беларускую выцінанку ў спіс нематэрыяльнай культурнай спадчыны чалавецтва. Пра гэта паведамляе Міністэрства замежных справаў Беларусі.
У гэты спіс беларускі феномен увайшоў пад назвай «Выцінанка – традыцыйнае мастацтва выразання з паперы ў Беларусі».
Выцінанка зарадзілася ў XVI стагоддзі. Гэты элемент беларускай культуры можна сустрэць у афармленні дамоў і грамадскіх месцаў, у тэатральных дэкарацыях.
«Сучасная выцінанка ахоплівае мноства тэмаў, якія адлюстроўваюць беларускі лад жыцця: любаванне прыродай, беларускую гісторыю, міфалогію, звычаі і вераванні, вясковы і гарадскі побыт. Гэта адна з эстэтычных асноваў беларускага менталітэту і культуры», – адзначае МЗС Беларусі.
Цяпер у спіс нематэрыяльнай культурнай спадчыны ЮНЭСКО ўваходзяць шэсць беларускіх элементаў: калядны абрад «Калядныя цары» ў вёсцы Семежава Капыльскага раёну Менскай вобласці (2009), урачыстасць у гонар шанавання абраза Маці Божай Будслаўскай (Будслаўскі фэст) у вёсцы Будслаў Мядзельскага раёну Менскай вобласці (2018), абрад «Юр'еўскі карагод» у вёсцы Пагост Жыткавіцкага раёну Гомельскай вобласці (2019), культура бортніцтва (2020) і пляценне з саломы (2022).
Арсен Рудэнка belsat.eu
