Абвінавачаны ў забойстве беларускі Лізы 23-гадовы Дор’ян С. прызнаў сваю віну, аднак не прызнаў, што меў намер забіць дзяўчыну. Ён распавёў, што адбылося ў тую ноч і чаму ён гэта зрабіў. Паказанні хлопца былі зачытаныя на працэсе, які пачаўся ў Варшаўскім акруговым судзе 4 снежня.
Дор’ян С. распавёў пра сябе, што станам на люты 2024 года ён не працаваў, не меў даходаў і маёмасці, з адукацыі мае за плячыма толькі гімназію, лячыўся ад наркатычнай залежнасці.
У судзе Дор’ян С. адмовіўся даваць паказанні, а таксама адказваць на пытанні пракурора ці суддзі, пагадзіўся толькі адказаць на пытанні сваіх адвакатаў. Праз гэта суддзя зачытаў паказанні хлопца, якія ён даваў 27 лютага сёлета.
Паводле абвінавачанага, у тую ноч, 25 лютага 2024 года, ён бавіў час у бары, дзе піў алкагольныя напоі, у нейкі момант далучыўся да кампаніі ўкраінак, з якімі таксама піў. Сцвярджае, што наркотыкаў не ўжываў, але ад алкаголю зрабіўся агрэсіўным. Пад раніцу ўкраінкі з'ехалі на таксі, а Дор’ян пайшоў пешшу.
«Адчуваў сябе дзіўна, не магу гэтага растлумачыць, не адчуваў ні страху, нічога, хоць агулам я баязлівы і эмацыйны», – казаў хлопец.
У нейкі момант Дор’ян С. убачыў дзяўчыну, пайшоў за ёй. Была 5-я гадзіна раніцы, вакол ішлі людзі. Дор’ян падбег да дзяўчыны і пачаў пагражаць нажом: хацеў спужаць, каб яна аддала яму грошы. У паказаннях пазначана, што распавядаючы гэта, падазраваны ў забойстве плакаў.
«Я не хацеў яе забіць, – кажа Дор’ян. – Я прыціснуў яе да сцяны і загадаў аддаць мне грошы, але яна мяне не разумела. Тады я перайшоў на англійскую мову, і тады яна мяне зразумела, запыталася, колькі мне трэба грошай, я сказаў: усе. Яна сказала: добра – але папрасіла, каб я аддаў ёй тэлефон, які забраў. Калі яна ўзяла тэлефон, я падумаў, што яна будзе тэлефанаваць у паліцыю, і пачаў яе душыць рукамі, а потым зняў сваю папругу, абвязаў вакол ейнай шыі і прывязаў яе да брамы, каб мець пэўнасць, што яна не ўцячэ і не паведаміць у паліцыю».
«На шляху дадому пачало даходзіць, што адбылося»
Дор’ян заціснуў папругу на шыі дзяўчыны і пачаў распранаць яе:
«Я не ведаю, чаму я гэта рабіў. Яна была без прытомнасці. Я згвалціў яе. Быў адзін акт».
Пасля згвалтавання Дор’ян пакінуў дзяўчыну ляжаць без вопраткі, забраў банкаўскія карты і тэлефоны Лізы, якая ляжала без прытомнасці, пачаў адыходзіць. На шляху дадому зайшоў у краму, набыў цыгарэты.
«Я не пазнаваў сябе. Я не ведаю, чаму згвалціў яе. Напэўна, тыя ўкраінцы мне штосьці падсыпалі, бо звычайна алкаголь так на мяне не ўплывае. Калі ішоў дамоў, да мяне пачало даходзіць тое, што адбылося», – казаў абвінавачаны.
Пра нож Дор’ян распавёў, што ўзяў яго з дому, бо меў намер абрабаваць краму ці бар, бо яму былі патрэбныя грошы, каб заплаціць 1600 злотых за кватэру. Апрача таго, хлопец распавёў, што на момант забойства Лізы ён паўгода быў у стасунках з дзяўчынай, гэта былі ягоныя другія стасункі, якія, з ягоных словаў, складаліся добра, у тым ліку ў сексе.
У тлумачэннях 12 красавіка Дор’ян дадаў, што ў той дзень ужываў алкаголь яшчэ ўдзень, да таго як пайшоў у бар, выпіў некалькі бутэлек піва.
«Я яшчэ не прыйшоў у сябе», – казаў хлопец і таксама плакаў.
З усімі сваімі паказаннямі, зачытанымі суддзёй, Дор’ян пагадзіўся.
Злачынства ў цэнтры Варшавы адбылося ў ноч на 25 лютага. Паводле следства, Дор'ян С. згвалтаваў беларуску Лізу і намагаўся задушыць яе. Дзяўчыну шпіталізавалі ў крытычным стане, праз шэсць дзён яна памерла.
Таксама глядзіце ў сюжэце:
Ганна Ганчар belsat.eu
