Свята-Елісавецінскі манастыр, што падтрымлівае вайну ва Украіне, зладзіў гандаль на калядным кірмашы ў польскім Шчэціне. Калі на гэта звярнулі ўвагу беларускія актывісты, улады пастанавілі спыніць супрацу з манашкамі.
«Купляючы тут, вы падтрымліваеце катаванні ў турмах у Беларусі і расейскую агрэсію супраць Украіны», – з такімі плакатамі актывісты прыйшлі да намёту Свята-Елісавецінскага манастыра на шчэцінскім кірмашы.
Менскіх манашак не ўпершыню заўважаюць на кірмашах у Заходняй Еўропе, прытым што яны не хаваюць прыязнасці да цяперашніх уладаў Беларусі і Расеі ды падтрымліваюць вайну ва Украіне.
Пра намёт манастыра ў Шчэціне напісала мясцовае выданне «Szczeciner», якое звярнулася да арганізатараў кірмашу. Прэс-сакратарка кампаніі «Żegluga Szczecińska Turystyka Wydarzenia» Цэліна Волаш адзначыла, што пра дзейнасць менскіх манашак там нічога не ведалі:
,,«Кожная арганізацыя, што падае заяўку на ўдзел у кірмашы, спраўджваецца на прадмет законнасці сваёй дзейнасці. Мы не ведалі, што гэтая арганізацыя можа падтрымліваць прарасейскую дзейнасць».
Як пісаў раней «Белсат», менскія манашкі плануюць у снежні ўдзел у кірмашах у трох цэрквах у Бельгіі. У адной з іх – праваслаўным прыходзе святых Афанасія і Аманда ў горадзе Лілюа – нам пацвердзілі супрацу з Свята-Елісавецінскім манастыром і заявілі, што ўсе абвінавачванні на іх адрас наконт падтрымання вайны – паклёп.
Настаяцель Пэр Бэрнар зрабіў такія высновы пасля ліставання з манашкамі. Яны напісалі, што «манастыр не бярэ аніякага ўдзелу ў вайне ва Украіне; што ўся інфармацыя, якая распаўсюджваецца ў інтэрнэце пра куплю беспілотнікаў, транспартавых сродкаў і гэтак далей, – ілжывая; што сродкі, сабраныя ў Заходняй Еўропе, ідуць толькі на развіццё двух цэнтраў прыёму бяздомных і дзіцячых дамоў пад іх патранажам, а таксама на сацыяльныя майстэрні, дзе атрымліваюць заробак інваліды і людзі, якія апынуліся ў цяжкай жыццёвай сітуацыі».
Бельгійскі святар гэтаму і паверыў.
«Я працягваю падтрымліваць іх гуманітарную працу дзеля дзяцей, адрынутых, самых абяздоленых, пра якіх яны клапоцяцца, нягледзячы на паклёп, і працягваю раз на год прымаць іх у нашым доме», – заявіў Бэрнар «Белсату», паведаміўшы, што прымае менскіх манашак ажно з 2016 года.
Свята-Елісавецінскі манастыр – бадай, самы вядомы ў Беларусі памагаты расейскім вайскоўцам. За 25 гадоў існавання манастыр развіў маштабны бізнес у вытворчасці і продажы свечак, абразоў, сувеніраў, гарбатаў, бальзамаў.
Таксама глядзіце ў сюжэце:
Сцяпан Кубік belsat.eu
