Крыніцы «Белсату» паведамляюць, што следства ў справе арыштаваных мужа і жонкі Аляксандра і Ірыны Л. распарадзілася накласці арышт на ўсю іхную маёмасць. Такая ж сітуацыя ў Вольгі А. і Таццяны П. У актывіста Ігара Х. забралі ўсе наяўныя грошы. У выніку гэтых дзеянняў ягоная сям'я засталася без сродкаў да існавання.
Нагадаем: 30 кастрычніка ў Наваградку адбылася аблава сілавікоў на мясцовых жыхароў. Паводле наваградчанаў, гэта былі супрацоўнікі ГУБАЗіКу. Крыніцы паведамляюць, што некаторых затрыманых сілавікі самі ў іх тэлефонах падпісвалі на тэлеграм-каналы, прызнаныя ўладамі экстрэмісцкімі. Пасля ператрусаў затрыманых адвозілі ў Горадню на допыт. Некалькіх чалавек адпусцілі, астатніх да суда пакінулі ў следчым ізалятары. З усіх бралі падпіску аб неразгалошванні. Да гэтага часу невядомая дакладная колькасць затрыманых.
Як мінімум шэсць асобаў застаюцца пад вартай. Супраць іх заведзеныя крымінальныя справы. Крыніцы «Белсату» паведамляюць, што супрацоўнікі ГУБАЗіКу падазраюць арыштаваных у адміністраванні тэлеграм-чату «Партызаны Наваградку».
belsat.eu
