Цягам ночы з 1 на 2 снежня зафіксаваны 31 заход у паветраную прастору Беларусі расейскіх беспілотнікаў тыпу «Шагэд».
На тэрыторыю нашай краіны дроны-камікадзэ траплялі з Украіны і Расейскай Федэрацыі, піша маніторынгавая група «Беларускі Гаюн».
Як адзначаецца, дроны праходзілі праз «беларускі калідор» і заляталі ў кірунку Лоева, Брагіна, Рэчыцы, Мазыра, Гомля і Хойнікаў. Адзін з дронаў некалькі разоў перасякаў паветраную прастору паміж Расеяй і Беларуссю і ў выніку вярнуўся ў РФ.
Першы з заходаў быў зафіксаваны а 23:03 1 снежня. Далей яны трывалі цягам ночы і спыніліся толькі пасля чацвёртай гадзіны раніцы.
Дзяжурная авіяцыя ВПС РБ у неба не ўздымалася. Як паведамляюць ПС Збройных сілаў Украіны, цягам гэтай ночы над тэрыторыяй Беларусі і Расеі лакацыйна былі згубленыя 6 беспілотнікаў.
Апошнім часам колькасць расейскіх дронаў, што заходзяць на тэрыторыю Беларусі, істотна павялічылася. Уначы з 24 на 25 лістапада была зафіксаваная рэкордная колькасць заходаў «Шагэдаў» на тэрыторыю нашай краіны – 38.
Пры гэтым беларускія ўлады, як правіла, або ніяк не каментуюць гэтыя інцыдэнты, або даюць сухія кароткія паведамленні. Жыхары паўднёвых раёнаў выказвалі занепакоенасць з нагоды заходаў беспілотнікаў і нават пісалі ліст у органы ўлады з просьбаю абараніць іх і іхных дзяцей ад магчымых наступстваў падзення дронаў. Аднак у адказ атрымалі дзяжурныя адпіскі з паведамленнямі пра тое, што ўсе неабходныя захады прымаюцца.
У той жа час вядомыя выпадкі, калі людзей, якія здымалі дроны на відэа і выкладвалі ў інтэрнэт, прыходзілі затрымліваць узброеныя сілавікі.
Раман Шавель belsat.eu
