«BYSOL» абвясціў пра пачатак каляднай акцыі «Падорым дзецям цуд!», накіраванай на дапамогу дзецям, чые бацькі знаходзяцца ў зняволенні паводле палітычных матываў.
Атрымаць дапамогу могуць чальцы сем’яў палітвязняў, у якіх ёсць дзеці да 16 гадоў уключна, калі нехта з іх бацькоў (адзін ці абодва) знаходзяцца зараз ці знаходзіліся раней больш за тры месяцы ў зняволенні.
Для атрымання дапамогі сваякам палітвязняў або вызваленым палітвязням неабходна запоўніць адмысловую заяўку па 20 снежня 2024 года ўключна.
Як абяцаюць арганізатары, кожнаму дзіцяці будзе выплачана дапамога ў 100 еўраў.
«Кожнае ваша ахвяраванне — гэта не проста падарунак, гэта знак таго, што свет не забыўся пра іх і пра іх сем'і. Разам мы можам стварыць свята, напоўненае цёплынёй і падтрымкай, дзе, хай на імгненне, дзеці адчуюць прысутнасць бацькоў», – гаворыцца на старонцы «BYSOL».
Усяго арганізатары плануюць дапамагчы 140 дзецям.
Разам з «BYSOL» акцыю, якая ўжо стала традыцыйнай, ладзяць фонд «Краіна для Жыцця», грамадская кампанія «BY_Help» і ініцыятыва «Dissidentby», якія разам уваходзяць у службу «Хуткай гуманітарнай дапамогі». Таксама да акцыі далучыліся партнёры Асацыяцыя беларускага бізнесу за мяжой і Асацыяцыя беларусаў Амерыкі.
Раман Шавель belsat.eu
