Сяргей Бульба, кіраўнік прасторы «Робім разам», якая паўстала на месцы Беларускага моладзевага хабу, пацвердзіў «Белсату», што ўлады Варшавы пакуль не хочуць падпісваць новую дамову аб арэндзе памяшкання ў цэнтры гораду, і абвінаваціў у гэтым «мінулае кіраўніцтва».
Выданне «Reform.news» паведаміла, што напрыканцы кастрычніка скончыўся тэрмін дзеяння дамовы арэнды памяшкання на плошчы Канстытуцыі ў Варшаве, дзе раней месціўся Беларускі моладзевы хаб, а потым пад кіраўніцтвам Сяргея Бульбы паўстала прастора «Робім разам». Паводле гэтай інфармацыі, ужо сёння арганізацыя мае выселіцца добраахвотна, іначай справа дойдзе да суда.
Памяшканне належыць Варшаве, ім распараджаецца дэпартамент кіравання нерухомасцю раёну Сьрудмесьце. Бульба пацвердзіў «Белсату», што старая дамова арэнды скончылася, а новую падпісваць не хочуць:
«Старая дамова аб арэндзе была заключаная на 3 гады, цяпер яна закончылася, а з новай – тут пакуль з горадам ідуць высвятленні. Надта багата мінулае кіраўніцтва правяло прапаганды. Відаць, з іхняй падачы нейкія людзі пісалі скаргі на нас, што мы і цір там зрабілі, што мы там баявыя мастацтвы выкладаем. Апошнія заявы былі, што ў нас булачкі нясвежыя, хаця аніякіх булачак у нас, натуральна, няма, але на ўсё гэта мясцовыя ўлады мусяць рэагаваць і кожны раз прысылаць камісію. Яны ўжо самыя прыходзяць да нас са смехам».
Сяргей Бульба сказаў, што канчаткова горад яшчэ не адмовіў, таму застаюцца надзеі на новую дамову арэнды:
,,«Падрыхтавалі поўны пакет дакументацыі, колькі мы зладзілі ўсяго за гэты час, 47 аркушаў атрымалася, сабралі подпісы, пад тысячу подпісаў перадалі ў нашае падтрыманне – звычайных людзей, якія заходзілі да нас. Усё ў такім перамоўным працэсе. Яшчэ будзе сустрэча з гарадскімі ўладамі».
Ён наракае, што чыноўнікі проста стаміліся ад скаргаў на прастору, пры гэтым нельга з упэўненасцю казаць, хто тыя нядобразычліўцы, бо строгае еўрапейскае заканадаўства забараняе раскрываць персанальныя звесткі:
«Апошняе, што яны прыдумалі: дамовіліся з нейкім дэпутатам, і дэпутат напісаў запыт, што ў нас у прасторы дзяцей навучаюць баявой зброі. Прыйшла і камісія, і паліцыя, ну, здавалася, разабраліся, што ніякіх парушэнняў у нас няма, усё добра, але горад, відаць, стаміўся ад гэтых пастаянных скаргаў, таму на сёння вось такі падвешаны стан».
Пакуль жа вызваляць памяшканне Бульба не плануе:
,,«Не, з'язджаць не плануем. На тыдні чарговую выставу пачынаем у прасторы. Так што пакуль усе папяровыя справы, то і Новы год плануем святкаваць тут».
Надоечы ініцыятыва «Робім разам» абвесціла збор на аплату арэнды і камунальных паслугаў, запазычанасць перавышае 27 тысячаў злотых (амаль 7 тысячаў долараў). У адпаведнай абвестцы на польскай мове адзначаецца, што з увагі на гэтую запазычанасць «цэнтр знаходзіцца пад пагрозаю закрыцця».
На момант публікацыі гэтага тэксту агульная сума ахвяраванняў склала 1 710 злотых.
Між тым мінулы кіраўнік юрыдычнай асобы «Białoruski Młodzieżowy Hub» (менавіта ёй належыць прастора «Робім разам») Алесь Лапко запэўніў карэспандэнта «Белсату», што аніякага дачынення да пераследу той арганізацыі не мае, бо і без таго ёсць чым заняцца:
«Мы займаемся сваімі справамі і развіваем хаб на Дажынковай. У нас штодня па некалькі івэнтаў. Я сам за апошнія паўгода пастаянна ў раз’ездах на канферэнцыях і сустрэчах. Адзінае, што я адрэагаваў на шматлікую хлусню і паклёп і рыхтую дакументы ў суд, бо гэта тычыцца мяне. А што і як там робіць Бульба, мяне мала цікавіць».
Лапко мяркуе, што Бульба сам вінаваты ў сітуацыі, якая цяпер склалася:
,,«Ён загнаў паспяховую арганізацыю ў даўгі, гэта прычына хіба, бо збор жа ён арганізаваў і не сабраў. Хай адказвае за свае дзеянні, а не адказнасць на мяне перакладае».
Беларускі моладзевы хаб аказаўся ў цэнтры скандалу ў жніўні летась. Тады ўстанову ўзначаліў Сяргей Бульба, які заяўляў, што змена кіраўніцтва адбылася цалкам законна. Алесь Лапко, які кіраваў хабам, называў тыя падзеі рэйдарскім захопам.
Пазней на плошчы Канстытуцыі ў Варшаве паўстала прастора «Робім разам», а Лапко заснаваў новую юрыдычную асобу, «Belarusian Youth Hub», і стары-новы Беларускі моладзевы хаб пачаў працу на Дажынковай вуліцы ў варшаўскім раёне Макотаў.
Сцяпан Кубік belsat.eu
