З 1 лістапада Транспартавая інспекцыя забрала больш як 30 машынаў у тых, хто парушыў новы ўказ, што абавязвае ўсіх перавознікаў быць у адмысловым рэестры.
Пра гэта паведаміў намеснік начальніка Транспартавай інспекцыі Міністэрства транспарту і камунікацыяў Дзмітрый Кулікоўскі. Ён дадаў, што Міністэрства праводзіць маніторынг і тлумачальную работу з дыспетчарамі аўтамабільных перавозак пасажыраў, дыспетчарамі таксі, з аўтамабільнымі перавознікамі наконт парадку выканання патрабаванняў заканадаўства.
Згодна з указам «Аб аўтамабільных перавозках пасажыраў», ад 1 лістапада без улучэння ў дзяржаўны рэестр перавознікаў дзейнасць таксі і тых, хто займаецца перавозам тавараў, абслугоўваннем вяселляў і юбілеяў, аказвае рытуальныя паслугі, уважаецца незаконнаю.
Да 31 кастрычніка ў рэестр можна было дадацца бясплатна. Цяпер трэба заплаціць за аднаго кіроўцу Br 40, за кожны транспартавы сродак – Br 80, за кожнага дыспетчара – Br 4 тысячы.
Калі рэгістрацыі няма, то кіроўцу могуць абвінаваціць у «незаконнай прадпрымальніцкай дзейнасці» і сканфіскаваць аўтамабіль.
Новыя захады прывялі да таго, што ў Менску колькасць таксі скарацілася на траціну, а ў Беларусі – на чвэрць.
Арсен Рудэнка belsat.eu
