У чацвер, 28 лістапада, каля цэнтральнага офіса кіруючай партыі «Грузінская мара» ў Тбілісі сабраўся стыхійны мітынг пасля заявы ўладаў аб прыпыненні ўступлення ў ЕС. Частка пратэстоўцаў таксама сабралася ля будынка парламента Грузіі на праспекце Руставелі.
Удзельнікі акцыі заяўляюць, што гэтае рашэнне з'яўляецца здрадай інтарэсаў краіны і парушэннем артыкула 78 Канстытуцыі Грузіі, які замацоўвае імкненне да еўрапейскай інтэграцыі, паведамляе «Рэха Каўказа».
Па іх меркаванні, такія дзеянні ставяць пад пагрозу будучыню Грузіі і руйнуюць шматгадовыя намаганні па збліжэнні з Еўропай.
Прэзідэнт Саламе Зурабішвілі праводзіла экстраныя кансультацыі з дыпламатычным корпусам, пасля яе таксама заўважылі на акцыі пратэсту ля будынка парламента.
Нагадаем, сёння, 28 лістапада, прэм'ер-міністр Грузіі Іраклій Кабахідзэ заявіў, што яго краіна адмаўляецца ад перамоваў аб уступленні ў ЕС да 2028 года. Пры гэтым у краіне працягваюцца акцыі пратэсту супраць верагоднай фальсіфікацыі вынікаў парламенцкіх выбараў. Партыя «Грузінская мара», згодна з інфармацыяй грузінскага ЦВК, атрымала 89 са 150 мандатаў. Апазіцыя і прэзідэнтка Саламэ Зурабішвілі адмаўляюць вынікі выбараў, якія адбыліся 26 кастрычніка, і патрабуюць правядзення новых выбараў. Апазіцыйныя дэпутаты праігнаравалі першае паседжанне парламенту на знак сваёй нязгоды з вынікамі выбараў.
Тэса Анэйда belsat.eu
