У Беларусі пройдзе акцыя «На родныя тавары. Навагодняя зніжка». Яна будзе распаўсюджвацца на беларускія харчовыя і нехарчовыя тавары, расказала Міністэрства антыманапольнага рэгулявання і гандлю (МАРГ).
Зніжка закране пэўны пералік тавараў і складзе 10 %. Зробяць яе за кошт вытворцаў і аб'ектаў гандлю. Удзел у акцыі пацвердзілі буйныя гандлёвыя сеткі і вытворцы. Зроблена гэта для таго, каб прасоўваць беларускую прадукцыю, адзначыла прэс-служба МАРГ.
«Зніжка будзе давацца памерам 10 % на даволі шырокае кола тавараў айчыннай вытворчасці. На сённяшні момант мы ўжо дамовіліся пра тое, што яна будзе давацца на кандытарскую прадукцыю, сокі, асобныя віды мэблі, адзення, абутку – пералік тавараў паступова будзе павялічвацца.
Цягам пераднавагодніх мерапрыемстваў і пасля Новага года нашы грамадзяне змогуць ацаніць годную якасць беларускай прадукцыі з прыемным бонусам у выглядзе 10 % зніжкі», – распавёў першы намеснік міністра антыманапольнага рэгулявання і гандлю Іван Вежнавец.
Каб арганізаваць акцыю, МАРГ яшчэ 4 лістапада збіраў у сябе прадстаўнікоў гандлю і вытворцаў.
Арсен Рудэнка belsat.eu
