Заснавальнік сеткі медцэнтраў «Новы зрок» Алег Каўрыгін распавёў Zerkalo.io, што думае пра завочны прысуд на 12 гадоў калоніі, які бізнесоўцу вынес Менскі гарадскі суд.
Пра прысуд Генеральная пракуратура Беларусі распавяла ў панядзелак, 25 лістапада. Алег Каўрыгін даведаўся пра яго ад журналістаў і зазначыў, што не валодае інфармацыяй пра тое, што адбывалася на паседжаннях.
,,«Я не ведаю, пра што ішла гаворка ў судзе. Не было ніводнага кантакту, ні з адвакатам, ні з нейкімі следчымі, агулам ні з кім, проста ні з кім. А я не хаваўся ад правасуддзя, не змяняў ні электроннай пошты, ні месца жыхарства. Больш за тое, я звяртаўся ў беларускае бюро Інтэрполу з просьбай даць мне нейкую інфармацыю ў гэтай справе», – зазначыў прадпрымальнік.
Каўрыгін таксама накіроўваў запыт у міжнароднае бюро Інтэрполу з просьбай распавесці, на якой падставе яго шукаюць сілавікі Беларусі. Аднак, са словаў бізнесоўца, прыйшоў адказ, што беларускі Інтэрпол просіць не інфармаваць Каўрыгіна пра нейкія дзеянні ў яго дачыненні і нават не ўдакладняць, ці ў вышуку ён.
Справу супраць «Новага зроку» Алег Каўрыгін называе палітычна матываванай, а эканамічны артыкул (нясплата падаткаў), на ягоную думку – толькі нагода для ўладаў Беларусі, каб апраўдаць свае дзеянні.
«Любы чалавек зразумее, што, калі я не з’яўляюся ў краіне больш за 10 гадоў, я не мог ніяк уплываць на дзеянні прадпрыемства. Больш за тое, кіраваць імі. А тым больш, здзяйсняць нейкія падатковыя злачынствы, паколькі я ёсць падатковым рэзідэнтам Літоўскай Рэспублікі з 2010 года. […] Фактычна мяне асудзілі за тое, што я выказаў свой пункт гледжання на тое, што адбываецца ў Беларусі, сумленна і неперадузята», – кажа бізнесовец.
Што да працаўнікоў клінікі, Каўрыгін мяркуе, што іх запужалі і вымусілі даць патрэбныя следству паказанні.
Заснавальнік «Новага зроку» зазначыў таксама, што не разумее, як Генпракуратура магла спагнаць з яго ў даход дзяржавы тры мільёны рублёў, бо ў Беларусі ў бізнесоўца не было такой сумы ці маёмасці, якая б столькі каштавала, а «Новым зрокам» ён ужо афіцыйна не валодае.
Абскардзіць прысуд Каўрыгін не мае магчымасці, бо не можа атрымаць матывацыйнай часткі, а акрамя таго, адвакаты ўнутры Беларусі ўжо даўно адмаўляюцца з ім працаваць. Бізнесовец будзе звяртацца ў міжнародныя інстанцыі.
Суд у Беларусі 25 лістапада 2024 года прызнаў Алега Каўрыгіна вінаватым у арганізацыі і кіраванні ўхілення ад выканання абавязкаў падатковага агента ў справе пераліку падаткаў у асабліва буйным памеры, а таксама ў арганізацыі і кіраванні ўхілення ад сплаты страхавых унёскаў у асабліва буйным памеры.
Таксама Каўрыгіна прызналі вінаватым ва ўхіленні ад сплаты падаткаў, што пацягнула за сабой шкоду ў асабліва буйным памеры, у спрыянні экстрэмісцкай дзейнасці, у тым ліку паўторна, у распальванні сацыяльнай варожасці, дыскрэдытацыі Рэспублікі Беларусь, закліках да санкцыяў і ў іншых дзеяннях, скіраваных на нанясенне шкоды нацыянальнай бяспецы краіны (агулам 9 артыкулаў Крымінальнага кодэксу Беларусі).
Суд прызначыў бізнесоўцу 12 гадоў пазбаўлення волі ў калоніі ўзмоцненага рэжыму, а таксама абавязаў яго выплаціць штраф 10 тысяч базавых велічыняў (400 тысяч рублёў). Каўрыгіну на пяць гадоў забаранілі займаць пасады, звязаныя з выкананнем арганізацыйна-распарадчых і адміністратыўна-гаспадарчых абавязкаў.
Таксама з заснавальніка «Новага зроку» спагналі ў даход дзяржавы больш за 3 мільёны ў якасці кампенсацыі шкоды ад нясплаты падаткаў на прыбытак.
У красавіку 2023 года супраць заснавальніка медцэнтру «Новы зрок» Алега Каўрыгіна і чацвярых працаўнікоў медустановы была распачатая крымінальная справа за нібыта выплаты працаўнікам заробкаў у канвертах. Улетку 2023 года Міністэрства аховы здароўя Беларусі пазбавіла клініку «Новы зрок» ліцэнзіі. Пасля гэтага «Новы зрок» паведаміў, што ідзе з рынку Рэспублікі Беларусь.
Таксама глядзіце ў сюжэце:
Марыя Міхалевіч belsat.eu
