У цэнтральнай частцы Малі групоўка «Джамаат Нусрат аль-Іслам валь-Муслімін», звязаная з тэрарыстычнай арганізацыяй «Аль-Каіда», паведаміла пра знішчэнне расейскіх наймітаў з ПВК Вагнэра.
Як адзначае Associated Press са спасылкай на заяву баевікоў, напад адбыўся 21 лістапада. Калона ПВК Вагнэра трапіла ў засаду, у выніку чаго забітыя шасцёра наймітаў.
Інфармацыю пра напад пацвердзіла агенцтву крыніца ў службах бяспекі Малі.
Reuters са спасылкай на маніторынгавую групу Site Intelligence Group пісаў, што прынамсі сямёра наймітаў ПВК Вагнэра загінулі ў выніку нападу.
Гэта не першая пастка, у якую сёлета трапілі вагнэраўцы ў саюзным Расеі Малі. Гэтак, у канцы ліпеня яны разам з урадавымі войскамі трапілі ў пастку паўстанцаў-туарэгаў. Кіраўніцтва паўстанцаў заявіла, што забітыя 54 вагнэраўцы і сем малійскіх вайскоўцаў. Але крыніца BBC заяўляла пра прынамсі 82 забітых наймітаў, што, паводле The Wall Street Journal, магло стаць адной з самых вялікіх страт расейскіх наймітаў у Афрыцы з моманту іх там з’яўлення ў 2017 годзе.
Якуб Хруст belsat.eu
