Прэтэндэнтка ў кандыдаты на пасаду прэзідэнта Беларусі Ганна Канапацкая сцвярджае, што ейная ініцыятыўная група перавыконвае план збору подпісаў – пра гэта палітык распавяла ў эфіры «Панарамы» на «Беларусь 1».
Са словаў Канапацкай, для сябраў ейнай каманды ўсталяваная мінімальная планка – 4 тысячы подпісаў за дзень.
,,«І магу сказаць, што гэты план выконваецца і перавыконваецца, і сёння я атрымала ў ЦВК дадатковыя пакеты для збору подпісаў, таму што мы апярэджваем графік для збору», – кажа ўдзельніца выбарчай кампаніі.
Колькі ўжо сабрана подпісаў, Канапацкая не ўдакладніла.
Збор подпісаў за вылучэнне кандыдатаў у прэзідэнты працягнецца да 6 снежня. Каб далей удзельнічаць у электаральнай кампаніі, ахвочым стаць кандыдатамі трэба сабраць не менш за 100 тысяч подпісаў. Пра тое, што яны ўжо здабылі гэтую колькасць, заявілі Алег Гайдукевіч і Аляксандр Лукашэнка. Датычна апошняга заяўляецца, што сабрана аж 1,5 мільёна подпісаў.
Астатнія прэтэндэнты ў кандыдаты – Сяргей Сыранкоў і Аляксандр Хіжняк – колькасць сабраных подпісаў не агучвалі.
Паводле праваабаронцаў «Вясны», людзей змушаюць падпісвацца за Лукашэнку праз ціск і маніпуляцыі. Сярод ужо традыцыйных метадаў – непрацягванне працоўных кантрактаў і высяленне з дзяржаўнага жытла.
Выбары прэзідэнта адбудуцца ў Беларусі 26 студзеня 2025 года.
Еўрапейскі парламент у заяве 29 кастрычніка падкрэсліў, што выбары ў Беларусі ў сённяшніх умовах не могуць лічыцца справядлівымі і свабоднымі. Чэхія і Эстонія заявілі, што не прызнаюць вынікаў прэзідэнцкіх выбараў у нашай краіне.
Марыя Міхалевіч belsat.eu
