Цяпер кіраўнікам бюджэтных арганізацыяў дазволена скарачаць штат, а зэканомленыя сродкі накіроўваць на даплаты тым, хто возьме на сябе абавязкі звольненых калегаў. Адпаведны ўказ напярэдадні падпісаў Аляксандр Лукашэнка. Ці дапаможа гэтая захада ўтрымаць людзей на працоўных месцах?
«Стымуляцыйнымі выплатамі» ў новай рэдакцыі ўказу «Аб аплаце працы працаўнікоў бюджэтных арганізацыяў» называюць фактычную аплату перапрацоўвання. Працаўнік мае права адмовіцца ад новых абавязкаў, але мусіць зрабіць гэта ў пісьмовай форме.
Сябра Прафсаюзнага руху Дзяніс Садоўскі каментуе сітуацыю:
,,«Калі ў цябе праблема – падаць сітуацыю так, што гэта не праблема, а аказваецца, мы яшчэ і людзям робім надбаўкі, стымулюем працу. Хоць у рэальнасці гэта ніякая не стымуляванне, а выключна спосаб эканоміі і недахоп кадраў на дзяржаўных прадпрыемствах».
Аднак грошы (нават за падвоеную працу) беларусам дакладна спатрэбяцца. Паводле звестак Белстату, намінальны налічаны заробак у краіне зніжаецца. Гэтак, у верасні сярэдні беларус да выплаты падаткаў зарабіў на 27 рублёў менш у параўнанні са жніўнем. Зніжэнне заробкаў зафіксаванае ва ўсіх рэгіёнах краіны. Скараціўся заробак і ў доларавым эквіваленце. Гэтак, толькі за лістапад у пераліку на замежную валюту ён знізіўся больш, чым на 20 долараў.
Былы бізнесовец, вядоўца праграмы «Атма$фера» на «Белсаце» Аляксандр Кныровіч бачыць праблему ў тым, што ў нас папярэднія заробкі былі загнаныя на ненатуральную вышыню, таму зараз мы бачым, як паступова змяншаецца рост ВУП, як паступова змяншаецца рост вытворчасці, а адпаведна змяншаюцца і заробкі ў эканоміццы.
Худнеюць нашыя гаманцы і праз базавую інфляцыю, якая цяпер складае 5,9 %. Паводле прагнозу Цэнтра эканамічных даследаванняў Beroc, налета яна можа дасягнуць 8 %. Пакуль жа эканоміка захоўвае адносную стабільнасць, беларусы актыўна трацяць грошы: у кастрычніку раздробны гандаль дадаў каля адсотка да паказнікаў верасня. Спрычыніліся да гэтага крэдыты.
,,«Дадалася яшчэ такая з‘ява, як вельмі хуткі рост спажывецкага крэдытавання. Гэта ўсё прыйшло на спажывецкі рынак і выклікала вельмі высокі, ненатуральны рост менавіта раздробнага гандлю, што адлюстроўваецца ў статыстыцы. І гэтая з’ява таксама павінная спыніцца калісьці», – кажа Аляксандр Кныровіч.
Падтрымаць спажывецкі попыт сярод бюджэтнікаў дапаможа падвышэнне базавай стаўкі заробку. З першага студзеня яна вырасце на 17 рублёў. Змены чакаюць і працоўных пенсіянераў, якія цяпер страчваюць частку пенсійных выплатаў праз заканадаўчыя абмежаванні. З пачатку года яны змогуць атрымліваць поўную пенсію і заробак адначасова.
Таксама глядзіце ў сюжэце:
Кацярына Гардзеева, «Белсат»
