Галоўны прадстаўнік у вонкавых сувязях Еўразвязу Пэтэр Стана даў эксклюзіўны каментар «Белсату» адносна выдачы Міжнародным крымінальным судом ордараў на арышт прэм’ер-міністра Ізраілю Бэньяміна Нэтаньягу і былога міністра абароны краіны Ёава Галянта.
Паводле Стана, Еўразвяз заўсёды і паслядоўна вельмі моцна стаяў на баку Міжнароднага крымінальнагу суда.
,,«Міжнародны крымінальны суд для нас – вельмі важная незалежная міжнародная ўстанова, створаная для забеспячэння адказнасці і правасуддзя на міжнародным узроўні за здзейсненыя найбольш цяжкія злачынствы. Усе пастановы Міжнароднага крымінальнага суда, у тым ліку ордары на арышт, – абавязковыя для ўсіх дзяржаваў – удзельніц Рымскага статуту МКС, і гэта датычыць усіх краінаў – сябраў Еўразвязу. Гэта азначае, што ўсе пастановы МКС, у тым ліку гэтая, абавязковыя для выканання ўва ўсіх краінах – чальцах Еўразвязу», – заявіў Пэтэр Стана.
21 лістапада Палата папярэдняга вядзення I Міжнароднага крымінальнага суда (МКС) выдала ордары на арышт прэм’ер-міністра Ізраілю Бэньяміна Нэтаньягу і цяпер ужо былога міністра абароны краіны Ёава Галянта за злачынствы супраць чалавечнасці і ваенныя злачынствы, учыненыя як мінімум з 8 кастрычніка 2023 года да як мінімум 20 траўня 2024 года. Пры гэтым быў адхілены зварот Ізраілю пра неправамоцнасць выдачы ордараў.
У абвінавачванні супраць Нэтаньягу і Галянта зазначаецца, што яны наўмысна і свядома пазбавілі цывільнае насельніцтва ў Газе харчоў, вады, лекаў і медычных сродкаў, а таксама паліва і электраэнергіі, перашкаджалі гуманітарным арганізацыям дастаўляць гэта. Пры гэтым такія абмежаванні разам з вымыканнем электрычнасці і скарачэннем паставак паліва сур’ёзна паўплывалі на даступнасць вады ў Газе і здольнасць шпіталяў надаваць медычную дапамогу.
Раніцаю 7 кастрычніка 2023 года на Ізраіль абрынуліся ракеты з сектару Газа, а пасля баевікі «Хамасу» ўварваліся на тэрыторыю Ізраілю, у тым ліку ў месцы, дзе праходзіў музычны фэст. У выніку атакі былі забітыя блізу 1200 ізраільцянаў і замежнікаў, а каля 250 закладнікаў былі вывезеныя ў Газу. Напад суправаджаўся жорсткімі катаваннямі і згвалтаваннямі. Здарэнне назвалі правалам ізраільскіх спецслужбаў.
8 кастрычніка Ізраіль пачаў вайсковую аперацыю «Жалезныя мячы» і назваў тое, што адбываецца, вайною.
Марыя Міхалевіч belsat.eu
