У Быдгашчы 20 лістапада пачаўся разгляд крымінальнай справы супраць удзельнікаў нацыяналістычнага і неафашысцкага руху «Kamractwo», піша «Wyborcza».
Судзяць адразу пяцёх чалавек. Іх вінавацяць у прапагандзе нянавісці на нацыянальнай глебе, нелегальным захоўванні зброі, а аднаго з мужчынаў – у нападзе на беларускага актывіста ў траўні 2021 года.
Беларуса Глеба Вайкуля 29 траўня 2021 года ў цэнтры Быдгашчы атакаваў адзін з абвінавачваных Войцех О., знаны сімпатыямі да Лукашэнкі і Пуціна. Мужчына накінуўся на беларуса з крыкамі « Хай жыве Лукашэнка! Хай жыве Пуцін! Валі, жыдоўская ануча, з маёй краіны!», а затым распыліў у вочы хлопцу слезацечны газ.
Нападніку на Вайкуля, а таксама ягонаму паплечніку Марціну О. закідаюць абразлівыя выказванні і заклікі да гвалту ў дачыненні габрэяў, украінцаў і беларусаў, што публікаваліся ў сацыяльных сетках і агучваліся на публічных сходах. Абвінавачванне сцвярджае, што заклікі паўтараюць тэзісы лукашэнкаўскай і пуцінскай прапаганды.
У 2022 годзе Войцех О. казаў, што хоча з’ехаць у Беларусь.
Яшчэ адзін з абвінавачваных, Пётр Р., у 2015 годзе ўжо быў асуджаны за спальванне лялькі габрэя на плошчы ў Вроцлаве.
Марыя Міхалевіч belsat.eu
