У адной з паўднёваазіяцкіх краін затрыманы былы баец Палка імя Кастуся Каліноўскага. Сябры турбуюцца, што яго могуць дэпартаваць у Беларусь.
Як паведамляе «Наша Ніва», затрыманне адбылося «з тыдзень таму». Назва краіны і імя ваяра не называюцца ў мэтах бяспекі. Пры гэтым невядома, з якіх прычынаў мужчына быў затрыманы.
Адзначаецца, што беларусу забаранілі знаходзіцца ў Еўразвязе, бо Літва прызнала яго пагрозай нацыянальнай бяспецы.
Саслужыўцы праінфармавалі ўкраінскую амбасаду ў гэтай азіяцкай краіне, але невядома, ці там трымаюць якіясьці захады.
Zerkalo піша, што затрыманаму 34 гаду і раней ён быў афіцэрам беларускай арміі, у Беларусі ён знаходзіцца ў вышуку. Апошні раз мужчына выходзіў на сувязь увечары 13 лістапада. Паводле суразмоўцаў выдання, сям’я ваяра ўжо знайшла мясцовага адваката, але той пакуль не здолеў з ім звязацца.
,,«На сённяшні дзень мы нават не ўпэўненыя, што наш сябар усё яшчэ ў краіне, дзе яго затрымалі. Нейкія навіны адвакат абяцае паведаміць у пятніцу, 22 лістапада», – сказаў знаёмы затрыманага.
Сваякі баяцца звяртацца ў беларускую амбасаду па дапамогу, каб з Менску не запатрабавалі ягонай выдачы.
Дарадца абранай прэзідэнткі Святланы Ціханоўскай у прававых пытаннях Леанід Марозаў паведаміў, што кантактуе з маці затрыманага і ўладамі краіны, дзе ён меркавана знаходзіцца.
25 верасня 2024 года стала вядома, што Вярхоўны суд Беларусі прызнаў полк Каліноўскага і яго структуры: батальёны «Волат», «Літвін», «Western», БПЛА імя Мiкiты Крыўцова, атрады «АТАМ», «Танга-Рамэа», мабілізацыйны цэнтр фонду «Беларускі дом у Варшаве» і рух «Каліноўцы» «тэрарыстычнай арганізацыяй».
Якуб Хруст belsat.eu
