Дыпламатычныя прадстаўніцтвы ЗША, Іспаніі ды Італіі часова закрылі свае амбасады ў Кіеве праз рызыку абстрэлаў. Калі яны адновяць сваю працу – не паведамляецца.
Першаю пра захады засцярогі напісала амерыканская амбасада.
«Амбасада ЗША ў Кіеве атрымала канкрэтную інфармацыю пра патэнцыйную значную паветраную атаку 20 лістапада. У якасці захады засцярогі амбасада будзе закрытая, а яе працаўнікам даручана схавацца на месцы. Амбасада ЗША рэкамендуе грамадзянам ЗША быць гатовымі неадкладна схавацца ў выпадку абвяшчэння паветранай трывогі», – сказана ў паведамленні на сайце.
Раніцай 20 лістапада ў Кіеве гучала паветраная трывога ў звязку з атакаю беспілотнікаў. Як піша Кіеўская гарадская вайсковая адміністрацыя, дроны былі збітыя ў Абалонскім і Падольскім раёнах украінскай сталіцы. Ахвяраў і разбурэнняў не было.
Надзея Вольная belsat.eu
