19 лістапада падчас сустрэчы са Святланай Ціханоўскай у Талліне міністр замежных справаў Маргус Цахкна заявіў, што Эстонія не прызнае прэзідэнцкіх выбараў у Беларусі ў 2025 годзе.
«Прэзідэнцкія выбары, што маюць адбыцца ў студзені 2025 года, арганізаваныя ў атмасферы тэрору, не могуць адпавядаць дэмакратычным нормам», – цытуе кіраўніка МЗС Эстоніі прэс-служба ведамства.
Нагадаем, што дэмакратычныя сілы Беларусі заклікаюць байкатаваць выбары-2025 – актыўна ці пасіўна. Еўрапарламент ужо заявіў, што выбары ў Беларусі не могуць быць прызнанымі справядлівымі і свабоднымі.
Падчас сустрэчы са Святланай Ціханоўскай Маргус Цахкна таксама адзначыў, што заходнія краіны «мусяць узмацніць санкцыі супраць рэжыму Лукашэнкі». Гэта неабходна, дадаў дыпламат, каб «ён зразумеў, што продаж сваёй краіны і народу Расеі непрымальны».
На сустрэчы міністр абвясціў, што Эстонія ўнясе 30 тысяч еўраў у Міжнародны гуманітарны фонд дапамогі палітвязням.
«Эстонія ўжо даўно лічыць вельмі важным падтрымліваць апазіцыю і палітвязняў Беларусі, і мы працягнем працаваць над вызваленнем усіх палітычных вязняў у Беларусі і Расеі», – падкрэсліў Цахкна.
Паведамляецца, што за падтрыманне беларускай апазіцыі Святлана Ціханоўская ўручыла Цахкну Крыж добрасуседства.
Паведамляецца таксама, што падчас візіту ў Эстонію Святлана Ціханоўская сустрэлася з міністаркай адукацыіКрысцінай Калас, міністаркай культуры Хэйдзі Пургай і міністрам унутраных справаў Лаўры Ляэнэметсам.
З міністрам унутраных справаў Лаўры Ляэнэметсам лідарка дэмсілаў Беларуі ўзняла наступныя пытанні:
- легалізацыя беларусаў у Эстоніі;
- стварэнне і адпраўка інструкцыяў у міграцыйныя органы Эстоніі пра тое, як працаваць з беларускімі кейсамі;
- выдача візаў і відаў на жыхарства студэнтам;
- пашпарты замежніка.
З міністаркай адукацыі абмеркавалі:
- дадатковыя стыпендыі для беларускіх студэнтаў;
- магчымасць увядзення беларускай мовы і гісторыі ў некаторых школах Таліна;
- адкрыццё Хола Антона Луцкевіча, першага прэм’ера БНР, якія вучыўся ва ўніверсітэце Тарту.
З міністрам замежных справаў:
- так званыя «прэзідэнцкія выбары» ў Беларусі –Эстонія загадзя не прызнала «выбары 2025»;
- падтрымку;
пазову Літвы ў Міжнародны крымінальны суд супраць рэжыму за злачынствы супраць чалавечнасці;
- узмацненне ціску на рэжым, комплекс санкцыяў за парушэннеі правоў чалавека;
- падтрымка дэмакратычных сілаў;
- падтрымка Міжнароднага гуманітарнага фонду – эстонскія ўлады прынялі рашэнне выдзеліць сродкі на беларускіх палітвязняў.
З міністаркай культуры:
- пераклад беларускай літаратуры на эстонскую мову;
- правядзенне сумесных мерапрыемстваў у галіне культуры;
- праграмы падтрымкі для беларускіх актораў і студэнтаў;
- выстава Уладзіміра Цэслера ў Эстоніі.
Надзея Вольная belsat.eu
