МУС назваў Беларусь «закладнікам сітуацыі» і абвінаваціў Захад у нежаданні ісці на дыялог

Беларусь «не ёсць першапрычынай зыходу мігрантаў са сваіх дзяржаваў», яна, «па сутнасці, зрабілася закладнікам сітуацыі». Пра гэта заявіў першы намеснік міністра ўнутраных справаў Беларусі Юрый Назаранка ў інтэрв’ю дзяржаўнаму выданню «СБ. Беларусь сегодня».

Асноўнымі прычынамі, «чаму людзі бягуць» са сваіх родных краінаў, чыноўнік назваў «эканамічныя, экалагічныя і гуманітарныя» праблемы.

Без выкаранення першапрычынаў незаконнай міграцыі, адзначыў чыноўнік, нельга «эфектыўна развязаць агульнасусветную праблему і знайсці выйсце з крызісу». Таму, робіць ён выснову, «дзеяць трэба толькі разам і Захаду, і Усходу, чаго на практыцы няма».

Намеснік міністра сцвярджае, што ніводнай спробы наладзіць дыялог і знайсці развязанне праблемы на агульнай мяжы з боку заходніх краінаў не было.

«Калі казаць пра загінулых, афіцыйная лічба такая: з 2021 года на мяжы Беларусі з ЕЗ загінулі каля 70 уцекачоў», – заявіў чыноўнік.

Назаранка згадаў пра праведзеную ў васьмі краінах аперацыю Еўраполу, у рамках якой польскія памежнікі затрымалі чальцоў міжнароднай злачыннай групы, што арганізавала канал нелегальнай міграцыі з РФ і Беларусі праз Польшчу ў краіны Заходняй Еўропы.

Больш за тое, намеснік міністра сцвярджае: «пакуль Еўразвяз робіць усё, каб не развязваць міграцыйнай праблемы», у той час як беларускі МУС «ва ўзаемадзеянні з іншымі сілавымі структурамі і ведамствамі робіць усё, каб спыніць каналы перамяшчэння нелегальных мігрантаў праз Беларусь».

Нагадаем, міграцыйны крызіс на мяжы Беларусі і краінаў ЕЗ цягнецца з вясны 2021 года. Улады суседніх еўрапейскіх дзяржаваў лічаць яго гібрыднай атакай, арганізаванай рэжымамі ў Менску і Маскве. З пачатку 2024 года суседнія краіны Еўразвязу перадухілілі амаль 35 тыс. спробаў мігрантаў нелегальна перасекчы мяжу з боку Беларусі. Амаль 29 тыс. спробаў было зроблена на беларуска-польскай мяжы.

Надзея Вольная belsat.eu