Дзеці палітвязняў сутыкаюцца з расстаннем з бацькамі і цяжкасцямі, якія складана пераадолець без дапамогі. Зрабіць іхныя святы больш светлымі, падараваць малы цуд і веру ў салідарнасць беларусаў можа кожны.
Мэта акцыі – падтрымаць сем'і, якія аказаліся ў складаных абставінах. Кожны ўнёсак, як распавядаюць арганізатары, будзе для дзяцей сімвалам надзеі.
Сабраныя сродкі будуць выдаткаваныя на падарункі: кожнае дзіця атрымае € 100, каб навагоднія святы былі больш цёплымі і радаснымі.
Калядную дзіцячую акцыю, якая ўжо зрабілася традыцыйнаю, арганізоўвае служба «Хуткай гуманітарнай дапамогі», у якую ўваходзяць фонды «BYSOL» і «Краіна для жыцця», грамадская кампанія «BY_Help» ды ініцыятыва «Dissidentby», а таксама партнёры: Асацыяцыя беларускага бізнесу за мяжой і Асацыяцыя беларусаў Амерыкі.
Звярнуцца па дапамогу могуць чальцы сем'яў палітвязняў, у якіх ёсць дзеці ў веку да 16 гадоў уключна і нехта з бацькоў (ці абое) застаюцца (больш за тры месяцы) або былі раней у зняволенні (таксама больш за тры месяцы). Калі вы сваяк палітвязня ці вызвалены палітвязень, для атрымання дапамогі запоўніце заяўку да 20 снежня 2024 года ўключна.
Надзея Вольная belsat.eu
