Нелегальны мігрант, якога падазраюць у нанясенні смяротнага ранення польскаму жаўнеру Матэўшу Сітэку праз агароджу на беларуска-польскай мяжы, пракраўся ў краіны Заходняй Еўропы.
Паводле інфармацыі генерала Аркад'юша Шкутніка, камандуючага аперацыяй «Бяспечнае Падляшша», падазраваны апошнім часам быў у Францыі і Бельгіі.
Генерал паведаміў, што асоба злачынца была ідэнтыфікаваная: маюцца ягоныя фатаграфіі і інфармацыя пра перамяшчэнні. Выяўлена, што падазраваны ўваходзіў у групу 42 небяспечных мігрантаў, якія нападалі на польскіх вайскоўцаў, ужываючы камяні і рагаткі.
,,«Мяркую, што ягонае затрыманне – гэта пытанне часу», – адзначыў генерал Шкутнік.
Раней з’явілася інфармацыя, што злачынцам можа быць грамадзянін Марока. Гэтую звестку актывістам перадала мігрантка, якая нелегальна мінула беларуска-польскую мяжу і падала заяву на міжнародную абарону. Афіцыйных каментароў ад польскіх службаў адносна гэтае версіі пакуль не было.
Матэўш Сітэк, 21-гадовы жаўнер 1-й Варшаўскай танкавай брыгады, атрымаў смяротнае раненне 28 траўня падчас штурму мяжы групай мігрантаў прыкладна з 50 чалавек. Адзін з іх пырнуў яго нажом, замацаваным на палцы, праз агароджу. Сітэку аказалі першую дапамогу, але 6 чэрвеня ён памёр у шпіталі. Напад зафіксавалі камеры назірання, што дазволіла ідэнтыфікаваць злачынцу.
Польскія ўлады неаднаразова патрабавалі ад Беларусі вызначаць і выдаць падазраванага.
У ліпені спецслужбы Польшчы абвясцілі, што выявілі забойцу жаўнера. Паводле іх звестак, на той час падазраваны заставаўся на тэрыторыі Беларусі, але існавала імавернасць, што ён мог эвакуявацца ў Сірыю.
Раман Шавель belsat.eu
