Расейскія валанцёры дапамаглі дваццаці беларусам выратавацца з фактычнага рабства, у якое тыя трапілі ў Падольску, працуючы на сметніку.
Як распавядаюць самі валанцёры з арганізацыі «Альтэрнатыва», якія змагаюцца з рабствам і гандлем людзьмі, усё пачалося з апавядання магілёўца Мікіты (імя змененае), які сёлета ў жніўні трапіў сартавальнікам на сметніцу ў Падмаскоўі.
Мікіта апісаў жахлівыя ўмовы жыцця, а таксама расказаў, што на сметніку працавалі каля 40 чалавек, у іх забіралі тэлефоны і дакументы, а саміх «рабочых» настройвалі супраць адно аднаго, каб пра жаданне ўцячы адразу даведвалася кіраўніцтва. Нават ежу і адзенне людзі вымушаныя былі шукаць на сметніку. Мікіта таксама расказваў пра жахлівую смерць жанчыны, якую не заўважылі і пераехалі грузавіком. Пасля гэтага выпадку людзей пачалі пераводзіць на іншыя аб'екты і хаваць, баючыся правяранняў. Мікіту перавезлі ў Маскву, адкуль яму ўдалося ўцячы. Але гісторыя атрымала працяг, і ў выніку правярання, у якім разам з валанцёрамі «Альтэрнатывы» бралі ўдзел расейскія праваахоўнікі, на сметніку пад Падольскам выяўленыя каля 60 беларусаў, якія прыехалі ў Расею на заробкі. Частка з іх прызнавалася, што рэгулярна вяртаецца для працы, а іншыя прасілі дапамогі, бо іх прымушалі працаваць без аплаты, адбіралі дакументы і пагражалі за спробу сысці.
,,«Падчас размовы, як гэта часта бывае, людзі падзяліліся на два лагеры – тых, хто з усмешкаю распавядаў пра тое, што рэгулярна сюды прыязджае зарабіць, і тых, хто прасіў дапамогі з'ехаць, бо дакументы ў іх забралі, грошы не плацяць, а пры жаданні сысці – пагражаюць», – пішуць валанцёры.
У выніку больш за 20 чалавек паехалі ў пастарунак, каб забраць дакументы і атрымаць магчымасць вярнуцца дадому. Высветлілася, што шмат хто з іх самі згаджаліся на працу, прапанаваную ў Гомельскай і Магілёўскай вобласцях, але ў выніку апыналіся на сметніку, дзе жылі ў цяжкіх умовах. Некаторым нават даводзілася шукаць патрэбныя рэчы сярод смецця.
Калі прадстаўнік сметніку зразумеў, што можа мець наступствы, пішуць людзі з «Альтэрнатывы», ён паабяцаў выплаціць заробкі і даставіць людзей назад у Беларусь. Большасць з «працаўнікоў» пагадзілася з такім развязаннем. А валанцёрам кіраўніцтва сметніку даслала відэа з пацвярджэннем аплаты працы.
Раман Шавель belsat.eu
