Аліна Коўшык паведаміла, што складае мандат сябры Каардынацыйнай рады ў сувязі з прызначэннем на пасаду дырэктаркі тэлеканалу «Белсат».
Заява Аліны была апублікаваная 16 лістапада ў тэлеграм-канале фракцыі «Еўрапейскі выбар».
,,«У сувязі з тым, што я не магу далей сумяшчаць сяброўства ў Каардынацыйнай радзе з выкананнем абавязкаў на новай пасадзе, я, Аліна Коўшык, добраахвотна складаю мандат сябры Каардынацыйнай рады», – паведаміла Коўшык.
Лідарства ў фракцыі перададзенае Валеру Мацкевічу.
«Зычу поспехаў Каардынацыйнай радзе ў яе дзейнасці і ў прасоўванні дэмакратыі ў Беларусі», – зазначыла ўжо былая сябра КР.
Пасля навіны пра ўзначальванне «Белсату» Аліна Коўшык таксама заявіла, што сыходзіць з пасады кіраўніцы прадстаўніцтва ў нацыянальным адраджэнні Аб’яднанага пераходнага кабінету, якую яна займала з верасня 2022 года. Адпаведныя абавязкі будзе пакуль выконваць намеснік Аліны Коўшык Павел Баркоўскі.
Пра прызначэнне Аліны Коўшык на пасаду дырэктаркі «Белсату» сталася вядома 15 лістапада. У сакавіку сёлета з пасады дырэктаркі «Белсату» была звольненая стваральніца тэлеканалу Агнешка Рамашэўская-Гузы. З таго часу абавязкі дырэктара «Белсату» выконваў Аляксей Дзікавіцкі.
Аліна Коўшык цягам 15 гадоў працавала на «Белсаце», у тым ліку ў якасці галоўнай вядоўцы, рэдактаркі і прадзюсаркі тэлепраграмаў.
Марыя Міхалевіч belsat.eu
