16 лістапада ў 10:30 раніцы ў Менскім гарадскім судзе мусіў распачацца разгляд справы палітзняволенай журналісткі Вольгі Радзівонавай, паведамляе «Беларуская асацыяцыя журналістаў».
Працэс вяде суддзя Вера Галаўкова.
Вольгу Радзівонаву абвінавачваюць паводле некалькіх артыкулаў Крымінальнага кодэксу Беларусі:
• ч.1 і ч.2 арт. 367 – «Паклёп на прэзідэнта»;
• арт. 369-1 – «Дыскрэдытацыя Рэспублікі Беларусь»;
• ч.1 арт. 130 – «Распальванне расавай, нацыянальнай, рэлігійнай ці іншай сацыяльнай варожасці»;
• ч. 1 арт.368 – «Абраза прэзідэнта».
Вольгу затрымалі 7 сакавіка 2024 года. Падчас утрымання пад вартай у СІЗА №1 у Менску журналістку накіроўвалі на псіхіятрычную экспертызу ў лякарню ў Навінках.
Удома ў Вольгі засталася хворая маці, старэйшая за 80 гадоў, якой патрэбны сталы догляд.
Журналістцы пагражае да 6 гадоў абмежавання ці пазбаўлення волі.
30 кастрычніка 2024 года праваабарончая супольнасць прызнала Вольгу Радзівонаву палітычнай зняволенай.
Па стане на 16 лістапада 2024 года ў Беларусі ў зняволенні знаходзяцца 36 журналістаў і супрацоўнікаў медыя, паведамляе БАЖ.
Марыя Міхалевіч belsat.eu
