Прадстаўніца Аб’яднанага пераходнага кабінету Аліна Коўшык прызначаная галоўнай рэдактаркай тэлеканалу «Белсат» і пакідае АПК.
Кіраўніца Аб’яднанага пераходнага кабінету Святлана Ціханоўская прывітала прызначэнне Аліны Коўшык на новую пасаду:
«Упэўненая, што яе праца на новай пасадзе ўзмоцніць "Белсат" і прынясе карысць нашай агульнай справе. "Белсат" мае вялізнае значэнне для Беларусі і дэмакратычнага руху, дае беларусам не толькі аб’ектыўную інфармацыю і пляцоўку для дыскусій, але і ўмацоўвае нашу нацыянальную ідэнтычнасць. З грамадскім і палітычным досведам, атрыманым у апошнія гады, Аліна вяртаецца да каманды, якую трэба захаваць і ўзмацніць у няпросты перыяд трансфармацыі тэлеканалу».
«Быць прадстаўніцай Аб’яднанага пераходнага кабінету – вялікі гонар. Працуючы ў гэтай камандзе, я многаму навучылася, пазнаёмілася са многімі замежнымі палітыкамі і кожную хвіліну імкнулася абараняць беларушчыну ўсімі дасяжнымі мне інструментамі. Я пакідаю каманду з распрацаванай Стратэгіяй, з шэрагам паспяховых кейсаў і канкрэтным планам на найбліжэйшую будучыню. Мы не развітваемся, я ўпэўненая, што беларускі дэмакратычны рух і "Белсат" непадзельныя. Нас чакае шмат выклікаў на ніве антыпрапаганды, стратэгічных камунікацый і папулярызацыі нацыянальнай культуры», – сказала Аліна Коўшык.
Аліна Коўшык цягам 15 гадоў працавала на «Белсаце», у тым ліку ў якасці галоўнай вядоўцы, рэдактаркі і прадзюсаркі тэлепраграмаў. Далучылася да Аб’яднанага пераходнага кабінету Беларусі ў верасні 2022 года. Была сузаснавальніцай Цэнтру беларускай салідарнасці ў Варшаве і «ІнБелКульт 2.0», клубу «Беларускі Варшавы». З адукацыі Аліна Коўшык гісторык, выпускніца Гарадзенскага дзяржаўнага ўніверсітэту імя Янкі Купалы, Цэнтру Усходняй Еўропы Варшаўскага ўніверсітэту і праграмы MBA ў сферы медыяменеджменту ў Стакгольмскай школе эканомікі ў Рызе.
Абавязкі прадстаўніка ў справе нацыянальнага адраджэння АПК будзе пакуль выконваць намеснік Аліны Коўшык Павел Баркоўскі.
У сакавіку сёлета з пасады дырэктаркі «Белсату» была звольненая стваральніца тэлеканалу Агнешка Рамашэўская-Гузы. З таго часу абавязкі дырэктара «Белсату» выконваў Аляксей Дзікавіцкі.
Якуб Хруст belsat.eu
