Раман Пратасевіч апублікаваў фота палітзняволенай Марыі Калеснікавай з ейным бацькам 12 лістапада. З паведамлення вынікае, што сам Пратасевіч таксама наведаў Марыю за кратамі.
У подпісе да фота Раман Пратасевіч зазначае: «Сёння сустрэліся з Марыяй».
Больш аніякай інфармацыі не прыводзіцца.
Паводле «Нашай Нівы», сустрэча Калеснікавай з татам адбывалася ў турэмным шпіталі – былыя палітзняволеныя пазналі антураж месца здымкаў. Невядома, ці Марыя цяпер праходзіць лячэнне.
Да гэтуль ад Марыі Калеснікавай не было ніякіх вестак больш за 600 дзён. Да сям'і даходзіла інфармацыя, што палітзняволеная схуднела да 45 кілаграмаў пры росце 175 см.
Марыя Калеснікава ўтрымліваецца ў Гомельскай папраўчай калоніі № 4. У лістападзе 2022 года ёй зрабілі аперацыю пасля шпіталізацыі з перытанітам праз прабадную язву. Пры такім дыягназе неабходныя адмысловае харчаванне і асаблівая ўвага лекара.
Калеснікава была затрыманая 7 верасня 2020 года і асуджаная на 11 гадоў калоніі. Ёй былі высунутыя абвінавачанні паводле арт. 361 Крымінальнага кодэксу («заклікі да дзеянняў, скіраваных на прычыненне шкоды нацыянальнай бяспецы Рэспублікі Беларусь»), арт. 357 КК («змова з мэтаю захопу ўлады неканстытуцыйным шляхам») і арт. 361-1 КК («стварэнне экстрэмісцкага фармавання або ўдзел у ім»).
Улетку 2024 года былая палітзняволеная распавяла праваабаронцам «Вясны», што адміністрацыя калоніі забараняе жанчынам кантактаваць з Марыяй. З ёю заўсёды ходзяць ахоўніцы, нават у прыбіральню. Сочаць за жанчынаю і іншыя зняволеныя, якія супрацоўнічаюць з адміністрацыяй.
Арсен Рудэнка belsat.eu
