Беларус у Польшчы ноччу вяртаўся дадому, але трапіў у шпіталь. У парку яго доўга збіваў паляк, якому падалося, што пацярпелы назіраў за тым, што той са сваёю жанчынаю рабіў у кустах. У выніку – пералом рабрыны, разрыў касы, аперацыя.
Аляксандр родам з Менску. У Гданьску мужчына жыве ўжо шэсць гадоў. 31 кастрычніка пасля сустрэчы з сябрамі ён вяртаўся дадому. Змеркаваў скараціць дарогу і пайсці праз парк. Так ягоны шлях быў бы карацейшым на 30 хвілінаў.
У нейкі момант мужчына спыніўся на сцежцы, каб папаліць і патэлефанаваць жонцы – паведаміць, што хутка будзе ўдома...У гэты момант у мабільным тэлефоне грала ўкраінская музыка. Практычна адразу пасля спынення мужчына пачуў крыкі і ўбачыў мужчыну, які насоўваецца на яго. У бок Аляксандра ішоў паляк, які гучна крычаў, а калі наблізіўся, пачаў вельмі жорстка збіваць беларуса.
«Калі я спрабаваў схаваць свой твар ад удараў, ён біў мяне па спіне ... Выбар у мяне быў невялікі: быць з пераламанымі рэбрамі або з перабітаю сківіцаю. Я спрабаваў супакоіць яго і пытаўся: «За што?». Ён мне адказваў, нібыта я за ім сачыў і глядзеў, што ён рабіў у кустах са сваёй дзяўчынаю. Але гэта не так. У лесапарку было вельмі цёмна, і я наагул нікога не бачыў!», – распавёў мужчына пра тое, што адбылося, выданню «MOST».
Са словаў пацярпелага, пасля збіцця ён папрасіў паляка, які збіў яго, выклікаць хуткую, але той быў непахісны:
«Ён адказаў: "Здыхай тут!". А потым пачаў казаць, што ў мяне ў краіне вайна, і я павінен ісці ваяваць. Але я тлумачыў, што я беларус, не ўкраінец. Тады ён пачаў мяне пытацца, чаму я слухаў украінскую музыку. І з новаю сілаю працягнуў мяне збіваць».
У гэты момант нападніка пачала клікаць дзяўчына. Так беларус даведаўся, што крыўдзіцеля завуць Патрык.
Агрэсіўны паляк адышоў. Аляксандр рушыў да выхаду. Праз тое, што выхад быў адзін, атрымалася так, што і нападнік, і збіты ішлі ў адным кірунку. Паляку гэта не падабалася, і ён нават па дарозе перыядычна падбягаў да Аляксандра і наносіў яму новыя ўдары.
Калі ўсе ўдзельнікі канфлікту выйшлі з лесапарку, каля аднаго з адміністрацыйных будынкаў нападнік зноў падбег да Аляксандра і паспрабаваў адабраць тэлефон.
«Ён крычаў, што я нібыта здымаў яго з дзяўчынаю, і патрабаваў выдаліць усе фота! Але мой тэлефон ужо быў разладаваны, што я мог на яго фатаграфаваць? Ён мяне не чуў і працягваў біць, пакуль з будынку не выйшаў ахоўнік. Ён пачаў крычаць, што выкліча паліцыю, і гэты Патрык хутка ўцёк...», – распавёў мужчына.
Аляксандр папрасіў ахоўніка выклікаць хуткую дапамогу. Медыкі, якія прыехалі, агледзелі мужчыну і адвезлі яго ў шпіталь, дзе дыягнаставалі пералом рабрыны і разрыў касы.
Мужчыну зрабілі аперацыю, касу вымушаны былі выдаліць.
Яшчэ ў шпіталі Аляксандр патрабаваў запрасіць паліцыю, каб напісаць заяву. Але яму патлумачылі, што ён цяпер пад уздзеяннем абязбольвальных прэпаратаў, якія змяшчаюць марфін. І нібыта ў такім стане паказанні даваць нельга.
Аднак, як вынікае з медычных дакументаў, персанал шпіталю ўсё ж праінфармаваў паліцыю пра здарэнне. Супрацоўнік паліцыі прыйшоў у шпіталь, каб узяць паказанні. Але акурат тады Алесь з жонкаю выйшлі ненадоўга з бальніцы. Паводле пацярпелага, ён адыходзіў на 15 хвілінаў. Прадстаўнік паліцыі пакінуў мужчыну позву.
12 лістапада Аляксандра чакаюць у камісарыяце для паказанняў. Мужчына ўжо выпісаўся са шпіталя і вельмі спадзяецца, што нападніка ўдасца апазнаць дзякуючы камерам відэаназірання, што былі ў парку.
Надзея Вольная belsat.eu
