У Магілёўскім абласным судзе 14 лістапада пачнецца разгляд крымінальнай справы супраць былога палітзняволенага Паўла Чуркіна, паведамляе праваабарончы цэнтр «Вясна». Працэс будзе весці суддзя Павел Клімаў.
Паўла Чуркіна абвінавачваюць у супрацы з украінскай выведкай, рыхтаванні да ўдзелу ва ўзброеным фармаванні або канфлікце на тэрыторыі замежнай дзяржавы (ч. 1 арт. 361-3 КК) і здрадзе дзяржаве (ч. 1 арт. 356 КК РБ).
Пра затрыманне Паўла Чуркіна сталася вядома яшчэ ў красавіку 2024 года з сюжэту на дзяржаўным тэлеканале «Беларусь 4 Магілёў». На відэа ён казаў, што здымаў размяшчэнне «Іскандэраў» у Беларусі на заданне ўкраінскай выведкі.
У 2021 годзе Чуркіна прысудзілі да года калоніі за «знявагу Лукашэнкі» (арт. 368 КК РБ). Жыхар Магілёва цалкам адбыў пакаранне і 24 траўня 2022 года выйшаў на волю.
Марыя Міхалевіч belsat.eu
