Чэшскія дэпутаты заклікалі ўлады Беларусі вызваліць палітвязняў і адзначылі, што ў нашай краіне няма ўмоваў для правядзення празрыстых і дэмакратычных выбараў прэзідэнта.
Свае заклікі дэпутаты чэшскага парламенту сфармулявалі ў адпаведнай рэзалюцыі, якая паўстала пасля кансультацыяў з Офісам дэмакратычных сілаў Беларусі ў Чэхіі, паведамляе радыё «Свабода».
У дакуменце гаворыцца, што прыняць яго рэкамендаваў таксама падкамітэт падтрымання дэмакратыі і правоў чалавека ў замежным камітэце чэшскага парламенту, а само прыняцце рэзалюцыі адбылося пасля абгрунтавання хадайніка Хаято Окамуры і дэбатаў, адзначае выданне.
У сваёй рэзалюцыі чэшскі парламент заклікаў улады Беларусі тэрмінова вызваліць Алеся Бяляцкага і іншых 1300 палітвязняў, зняволеных за мірную дзейнасць на карысць дэмакратыі і правоў чалавека. Дэпутаты таксама выступілі з заклікам спыніць палітычныя рэпрэсіі і пераслед апанентаў рэжыму Лукашэнкі.
Акрамя таго, дэпутаты чэшскага парламенту падкрэслілі, што прызначаныя на 26 студзеня 2025 года выбары не могуць быць прызнаныя легітымнымі, пакуль кандыдаты з выбараў 2020 года застаюцца ў зняволенні.
Раман Шавель belsat.eu
