Вытворчасць формы для вайскоўцаў наладзілі ў філіяле расейскай кампаніі «БТК Групп». Паводле крыніцы «Белсату», фабрыка працуе ў дзве змены па 12 гадзінаў. Штотыдзень у Расею выпраўляюць фуру гатовай прадукцыі.
«БТК Групп» запусціла вытворчасць у Берасці ў будынку, дзе працавала казіно «Мяцеліца». Гэтую расейскую кампанію называюць гігантам лёгкай прамысловасці. З 2010 года прадпрыемства толькі ад Мінабароны Расеі атрымала дзяржкантрактаў на $ 95 млн. Кампанія таксама абшывае «Расгвардыю», МУС і Следчы камітэт Расеі.
Літаральна ў гэтыя дні берасцейскі філіял атрымаў новую партыю тканінаў для вопраткі вайсковых узораў, паведаміла крыніца «Белсату». Для Беларусі і Расеі шыюць спартовае адзенне, астатняе – для Расеі: жаўнерскае і спецыяльнае адзенне.
Паводле звестак крыніцы, штотыдзень у суседнюю краіну выпраўляюць адну фуру гатовай прадукцыі. Працуюць на берасцейскай фабрыцы толькі мясцовыя:
,,«Працуюць у дзве змены, кожная – 12 гадзінаў. Заробак швачкі – да 7000 рублёў».
Як падлічыў раней Белстат, сярэдні налічаны заробак у Берасцейскай вобласці ў верасні склаў Br 2063,6.
На старонцы расейскай кампаніі «БТК Групп» пазначана, што за год беларускі філіял выдае 63 936 вырабаў. Прамысловая плошча – 3124 м². Немалы і штат – 401 асоба.
Былы палітвязень з Берасцейшчыны і стваральнік Асацыяцыі палітвязняў «Да Волі» Алег Кулеша раздабыў і паказаў журналістам «Белсату» куртку «БТК групп» айчыннае вытворчасці:
«Новая беларуская якасць! Гэта ўжо не першы варыянт, і ў іх шыюць даволі шмат. Гэта прыклад расейскай жаўнерскай вопраткі. Спадзяюся, што будзе цудоўна выглядаць як пахавальнае адзенне для гэтых жаўнераў».
Холдынг «БТК групп» пачаў пашырацца ў 2022 годзе прапарцыйна патрэбам расейскіх войскаў ва Украіне. Дзяржаўныя і бізнес-інвестыцыі ў кампанію выраслі ў шэсць разоў, напісана на старонцы фірмы «УКантакце». Колькасць фабрык вырасла да шаснаццаці. Сярод якіх – берасцейская.
Алег Кулеша акцэнтуе: не ўсе беларусы добраахвотна працуюць на карысць агрэсараў.
«У Берасці працуюць людзі, якія пайшлі, на мой погляд, у парабкі. Гэта справа кожнага. А ў калоніях выкарыстоўваюць працу палітвязняў на карысць узбраення Расейскай Федэрацыі», – кажа праваабаронца.
Напрыклад, у папраўчай калоніі № 3 у Віцебску ды ў жаночай калоніі ў Гомлі зняволеныя шыюць форму для вайскоўцаў і сілавікоў у дзве змены і звышурочна, як берасцейскія швачкі ці тыя, што працуюць на «Магатэкс». На рукі вязні атрымліваюць Br 20.
Улады Беларусі непрыхавана зарабляюць на падтрыманні вайсковай прамысловасці Расеі. Пад санкцыі Еўразвязу трапіла Беларускае аптычна-механічнае аб'яднанне і яго прадпрыемствы за выраб прыцэлаў для войска РФ. У тым жа спісе – «Пеленг», 566-ы рамонтны і Аршанскі авіярамонтны заводы.
Сярод кандыдатаў на санкцыі – «Легмаш», што выпускае кампаненты для расейскіх «Градаў»; «СтанкаГомель», што робіць станкі для расейскага ВПК; «Белшына», што напярэдадні выйшла з-пад санкцыяў як спонсар дзяржавы – і тут жа ўзялася забяспечваць расейскую вайсковую тэхніку сваімі апонамі; «Амкадор», што развівае вытворчасць ударных беспілотнікаў «Свіслач СВТ» і сістэму навядзення артылерыйскага агню «Вартавы»; беларускія НПЗ, што забяспечваюць авіяпалівам расейскія аэрадромы.
«Беларусь актыўна ўцягнутая ў выраб, у першую чаргу, тавараў высокатэхналагічных. Гэта прыцэльныя комплексы для бранятэхнікі. Гэта рознага кшталту мікраэлектроніка. У прыватнасці, сістэмы, што ўсталёўваюць на баявую авіяцыю. Беларусь не пастаўляе гатовай прадукцыі – напрыклад, гатовых танкаў ці нейкай іншай тэхнікі. А гэта субкантрактынг», – кажа ў каментары «Белсату» аналітык праграмы расейскіх і беларускіх даследаванняў Рады вонкавай палітыкі «Украінская прызма» Паўло Радзь.
Пра гэтыя факты вядома з адкрытых крыніцаў, ад расследавальнікаў, праз інсайдарскую інфармацыю, а таксама ад украінскіх жаўнераў.
«Тыя ж самыя сістэмы СПА С-400 “Трыумф” – шасі будуюць на Менскім заводзе колавых цягачоў. Тое самае датычыць ракетных комплексаў “Ярс” і “Топаль”, што нясуць, да таго ж, ядравую зброю. Гэта датычыць таксама “Іскандэраў”. Прыцэльныя комплексы тыпу “Эса”, “Пліса” і “Сасна” ўсталёўваюць на расейскія танкі Т-70, Т-5, Т-2, на БМП-3. Шырокі спектр заданняў, якія выконвае беларуская абаронка на патрэбы расейскай арміі», – рэзюмуе Радзь.
У пакеце «крывавых» даходаў на мэты так званай СВА – таксама грошы ад продажу харчоў: сухіх пайкоў, згушчанкі ды кансерваў.
Юлія Цяльпук, Сцяпан Кубік belsat.eu
